Samarqandda o‘quvchini urib, uning quloq pardasini yirtib yuborgan maktab direktoriga jazo tayinlandi

Samarqand viloyatining Urgut tumanida maktab direktori 12 yoshli o‘quvchini urib, uning quloq pardasini yirtib yuborgani to‘g‘risida xabar berilgandi. Oliy sud matbuot xizmatining ma’lum qilishicha, holat bo‘yicha yig‘ilgan hujjatlar sudda ko‘rib chiqilgan. 

“Borsam bolalar doskada turgan ekan. Paqildoq tashlangan ekan. Achchiq ustida shu bolani bir shapaloq urdim. Bolani Toshkentga 3 marta olib borib, davolatib keldim. Hozir u yaxshi”, — deydi sobiq direktor.

Aytishlaricha, jabrlangan bolaning umuman aybi bo‘lmagan. Sinfxonada portlatilgan paqildoq maktab oshxonasidan sotib olingan. Yaqinda ta’mirdan chiqarilgan maktabda zamonaviy kuzatuv kameralari ham o‘rnatilgan, biroq tasvirlar qasddan o‘chirib yuborilgan.

Besh, olti marta urib, qulog‘iga tepgan. Boshi borib partaga urilgan. Boshi chayqalgan. O‘g‘lim jon ustoz urmang, deb yig‘lagan. Hozir davolatdim deyapti, davolatgan bo‘lsa, bolamning qulog‘i eshitsin. Xulosani yozib qo‘yibdi, doktor, — dedi jabrlanuvchi bolaning otasi.

Sud hukmiga ko‘ra, sobiq direktor Jinoyat kodeksining 206-moddasi (hokimiyat yoki mansab vakolati doirasidan chetga chiqish) 1-qismi bilan 3 yilga taʼlim sohasida mansabdorlik va moddiy javobgarlik lavozimida ishlash huquqidan mahrum qilinib, unga nisbatan 2 yilga ozodlikni cheklash jazosi tayinlandi.

Avvalroq yuqoridagi holatdan kelib chiqib, ushbu maktab direktori B.R. Samarqand viloyat xalq ta‘limi boshqarmasining tegishli buyrug‘iga asosan lavozimidan ozod etilgandi.