Тармоқларда қашқадарёлик ҳайдовчига тегишли автомобиль юкхонасида бўри ортилгани тасвирланган видео тарқалгач, Telegram каналларида шу бўрининг ўлдирилгани ҳақида хабарлар пайдо бўлди. Қашқадарё вилояти Экология, атроф-муҳитни муҳофаза қилиш ва иқлим ўзгариши бошқармаси мазкур хабарларга муносабат билдириб, бўри ўлдирилмаганини, қочиб кетганини очиқлади.
Дастлабки видеода тутиб олинган урғочи бўри уч-тўрт нафар эркак томонидан бўйнига занжир боғлаган ҳолда машина юкхонасидан пастга туширилгани тасвирланган. Бу пайтда атрофда ёш болалар, аёллар бўлган. Бўрининг кейинги тақдири номаълумлигича қолган.
Telegram каналларида тарқалган бошқа хабарда бўри сим билан бўғиб ўлдирилгани айтилган. Бироқ, хабар манбаси очиқланмаган.
Бошқарманинг мазкур хабарга муносабат билдиришича, ҳолат 12 декабрь куни ўрганилган.
Ўрганиш давомида маълум бўлдики, Ғузор туманининг “Яккадарахт” маҳалласида яшовчи фуқаро Р.Р. 11 декабрь куни далада қўй боқиб юрганида, қўйларига бўри ҳужум қилган. Кейин у ушланиб, уйга олиб келинган ва машинага боғлаб қўйилган. Фуқаро эртаси куни тегишли ташкилотларга хабар бермоқчи бўлганида, бўри 11 декабрь куни кечки пайт қочиб кетгани маълум бўлган, — дейилади бошқарма масъуллари берган маълумотда.
Таъкидланишича, бўрининг ўлдирилганлиги ҳақидаги хабарлар асоссиз.
Шу ўринда ёввойи ҳайвонларга нисбатан шафқатсиз муносабатда бўлишни кескин қоралаймиз ва бу қонунда белгиланган тартибда қатъий жазога сабаб бўлишини яна бир бор эслатиб ўтамиз, — дейди экология бошқармаси масъули.
Изоҳ (0)