Алексей Навалнийнинг шериклари сиёсатчини қидириб Москвадаги аксарият изоляторларни текшириб чиқди, бироқ уни ҳеч қаердан топа олмади, деди Навалний асос солган Коррупцияга қарши кураш фонди директори Иван Жданов.
Baza нашрининг Алексей Москвада экани ва у билан тергов ҳаракатлари олиб борилаётгани ҳақидаги маълумоти тасдиқланмади. Тергов адвокатларсиз амалга оширилмайди. Барча тергов ҳаракатлари Владимирда ўтказиб бўлинган. Саккиз кундан бери Алексей Навалнийнинг қаердалигини билмаймиз, — деб ёзди Жданов ижтимоий тармоқда.
Сиёсатчининг матбуот котиби Кира Ярмишнинг қўшимча қилишича, Навалний шифокорлар назоратида экани ҳақидаги миш-мишлар тасдиқланмаган.
Алексей “шифокор назорати остида” деган миш-мишлар ҳам бор эди. Биз бу миш-мишларга ишонмаймиз ва бизда уларнинг тасдиғи йўқ. Алексейга уч йил давомида тиббий ёрдам кўрсатилмади, бир йилдан кўпроқ вақт давомида унга ҳатто тиш шифокорига боришга ҳам рухсат берилмади, — деб ёзган Ярмиш.
11 декабрь куни Владимир вилоятининг Мелехово қишлоғидаги 6-сонли ахлоқ тузатиш колонияси ходимлари Алексей Навалний энди уларнинг рўйхатида йўқлигини маълум қилди. Колония унинг қаерга кўчирилганини ошкор қилмади. Бунгача адвокатга сиёсатчи билан учрашишга рухсат берилмаган, Навалнийнинг ўзи эса суд мажлисларига видеоалоқа орқали иштирок этмаган. 12 декабрь куни Baza Telegram канали ўз маълумоти манбаларини кўрсатмай, Навалний вандализм бўйича янги жиноий иш бўйича тергов ҳаракатларини ўтказиш учун Москвага кўчирилганини ёзди.
Алексей Навалний 2021 йил бошидан бери қамоқда. 2023 йил августида Москва шаҳар суди сиёсатчини “экстремизм” иши бўйича махсус режимли колонияда 19 йиллик қамоқ жазосига ҳукм қилди. Сиёсатчининг ғойиб бўлиши унинг жазо ўташ учун янги колонияга ўтказилиши билан боғлиқ бўлиши мумкин.
Изоҳ (0)