Владимир вилоятидаги колонияда жазо муддатини ўтаётган сиёсатчи Алексей Навалний 22-маротаба жазо изоляторига жойлаштирилди. Бу ҳақдаги маълумот унинг Telegram каналида пайдо бўлган.
“Жазо изоляторидан бир кечага чиқаришди ва яна 15 сутка беришди. Асос — маҳкум Навалний ёзув материалларининг мусодара қилинишига норозилик билдириб, ўз хонасини тарк этишдан ва ўзи олиб борилиши керак бўлган бошқа хонага киришдан бош тортгани. Шу муносабат билан унга кун давомида тўрт марта жисмоний куч ишлатилган. Натижада 22-жазо изолятори ва 251 сутка”, — дейилади хабарда.
Бундан олдинги сафар мухолифатчи жазо изоляторига 24 октябрда жойлаштирилган эди.
Алексей Навалний 2021 йил февралдан буён Владимир вилоятидаги жазони ўташ колониясида сақлаб келинмоқда. Сиёсатчи қамоқхона цензорлари унинг хатларини олиб қўяётгани, шунингдек, пулли тиббий хизматлардан фойдаланишни тақиқлаётганидан шикоят қилган.
Август бошида Москва шаҳар суди Владимирдаги қаттиқ тартибли колонияда ўтказилган йиғилишда сиёсатчи Алексей Навалнийни 19 йилга қамаганди. Мухолифатчи унга қамоқ муддати берилгач, “Сталин давридаги каби” нола қилмасликни тавсия қилганди. “Яхшиси, ўйлаб кўринг, нега бундай катта муддат бериляпти? Бунинг асосий мақсади — қўрқитиш. Мени эмас, сизларни”, — деган Навалний суд ҳукмидан олдин.
Изоҳ (0)