Польша парламент комиссияси янги бош вазир Дональд Туск таклифига биноан мамлакатнинг барча бешта разведка хизмати раҳбарларини ишдан олди. Бу ҳақда Zet радиостанцияси хабар берди.
Хабарга кўра, гап Коррупцияга қарши курашиш марказий бюроси, разведка бошқармаси, ҳарбий разведка хизмати, ҳарбий контрразведка хизмати ва ички хавфсизлик агентлиги ҳақида бормоқда.
“Разведка хизматлари бўйича парламент комиссияси бешта хизмат раҳбарларини истеъфога чиқариш бўйича таклифларни ижобий кўриб чиқди”, — дейилади хабарда.
12 декабрь куни Польша парламентининг қуйи палатасида Дональд Туск ҳукуматига ишонч билдирилганди. 460 депутатдан 248 нафари овоз беришни қўллаб-қувватлаган, 201 нафари қарши чиққан. Бетарафлар бўлмаган.
13 декабрь куни маҳаллий вақт билан соат 09:00 да Польша президенти Анжей Дуда бош вазир Дональд Туск ва унинг ҳукумати қасамёдини қабул қилган.
Дональд Туск 2007-2014 йилларда Польша Вазирлар Маҳкамасини бошқарган. У Европа Кенгаши раҳбарлигидан истеъфога чиққан ва беш йилдан сўнг бу лавозимни Шарл Мишел эгаллаган.
Изоҳ (0)