Тошкент шаҳрида бўлиб ўтган “Жадидлар: миллий ўзлик, истиқлол ва давлатчилик ғоялари” мавзусидаги халқаро илмий конференцияда иштирок этган Президент маслаҳатчиси Саида Мирзиёева алифбони ўзгартириш масаласида ҳадеб баҳслашавермай, тезроқ қарор қабул қилиш кераклигини таъкидлаб ўтди.
Тилшунос олим Элдор Асановнинг фикрича, O‘ o‘ ҳарфини компьютердаги ёзувда акс эттириш қийинчилик туғдиради.
Компьютер тизимлари ўқиши — идентификация қилиши, шифр, пароль, код ва бошқаларда акс эттириш ҳам муаммо келтириб чиқаради.
Агарда қўшимча ҳарф керак бўлса, у ҳарфни турли шаклларда ўзгартириш мумкин. Лекин ёнидаги апострофни ўзгартириш жуда кам учрайдиган, кўп чалкашлик келтириб чиқарадиган ва хунук кўринадиган ҳолат. Эстетик жиҳатдан ҳам бир ҳарфнинг ёнига вергул қўйиш хунук кўринади, — деди Элдор Асанов.
Блогер Шаҳноза Соатова алифбо масаласида ва ниҳоят қандайдир мантиқий нуқта қўйилиши кераклигини таъкидлади.
Алифбо масаласи кун тартибига чиққанидан бир жиҳатдан хурсандман. Чунки анчадан бери бу мавзуда гапириб келамиз. Ва ниҳоят қандайдир мантиқий нуқта қўйилиши керак.
Амалиётда лотин ёзувига асосланган ўзбек алифбосидан фойдаланиб келаётганлар билади, бир қанча ноқулай харфларимиз бор. Улардан бири ватанимиз номида биринчи бўлиб келадиган O‘ ҳарфи, қолаверса, G‘ ҳарфи, ундан кейин қўш ҳарфларимиз бор.
Бу мавзу илк марта кўтарилганига беш йиллар бўлди. Ташқаридан қараганда иккита белгини ўзгартириш жуда осон. Масалан, 2016 йилда қорақалпоқ алифбосида ўзгарган ва ҳозирда фойдаланиб келинмоқда. Биз ҳам бу муҳим қадамни қўйишимиз керак, деяпмиз. Президент айтдилар, президент ёрдамчиси нутқида ҳам шу мавзу кўтарилди, — дейди блогер.
Тилшунос олим Ориф Толиб ўз Telegram каналида ўзгаришлар чала-ярим қилинмасдан, ҳеч қурса, шу 4 ҳарф тўлиқ таркибда ихчамлашувидан умид қилаётганини таъкидлаган.
Изоҳ (0)