Тошкент вилоятида табиий газ тармоқларига ноқонуний уланиш ҳолатлари фош этилди, деб хабар беради Бош прокуратура ҳузуридаги департамент.
Маълум қилинишича, департаментнинг Зангиота туман бўлими томонидан газ таъминоти бўлими ходимлари билан ҳамкорликда терговга қадар текширув ўтказилган. Текширув давомида якка тартибдаги тадбиркор К.К. ўз уйида фуқаро Қ.Л. билан ишлаб чиқариш цехи ташкил қилиб, умумий фойдаланишдаги газ тармоғига ҳеч қандай ҳужжатсиз тижорат мақсадида уланиб, 141,9 миллион сўмлик табиий газдан ноқонуний фойдалангани аниқланган.
Шу каби, департаментнинг Тошкент туман бўлими томонидан ИИБ ва газ таъминоти бўлими ходимлари билан ҳамкорликда ўтказилган тезкор тадбирда фуқаро У.Ж “Б.” МФЙ ҳудудидаги уйида яширин цех ташкил қилиб, ўғирлик йўли билан табиий газ тармоғига уланиб олиб, истеъмолчиларнинг ҳаёти ва соғлиғи хавфсизлиги талабларига жавоб бермайдиган чипс маҳсулотларини ишлаб чиқараётгани аниқланган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Бундан олдин Тошкент ва Андижон вилоятларида оҳак ишлаб чиқариш цехи ва иссиқхона газдан ноқонуний фойдаланиши натижасида тизимга 876 миллион сўм зарар етказгани тўғрисида хабар берилганди. Шунингдек, Ўзбекистонда йил бошидан буён ҳуқуқ-тартибот органлари томонидан ўтказилган назорат тадбирларида 26 та ноқонуний майнинг ферма фош қилинган.
Изоҳ (0)