Toshkent shahrida bo‘lib o‘tgan “Jadidlar: milliy o‘zlik, istiqlol va davlatchilik g‘oyalari” mavzusidagi xalqaro ilmiy konferensiyada ishtirok etgan Prezident maslahatchisi Saida Mirziyoyeva alifboni o‘zgartirish masalasida hadeb bahslashavermay, tezroq qaror qabul qilish kerakligini taʼkidlab o‘tdi.
Tilshunos olim Eldor Asanovning fikricha, O‘ o‘ harfini kompyuterdagi yozuvda aks ettirish qiyinchilik tug‘diradi.
Kompyuter tizimlari o‘qishi — identifikatsiya qilishi, shifr, parol, kod va boshqalarda aks ettirish ham muammo keltirib chiqaradi.
Agarda qo‘shimcha harf kerak bo‘lsa, u harfni turli shakllarda o‘zgartirish mumkin. Lekin yonidagi apostrofni o‘zgartirish juda kam uchraydigan, ko‘p chalkashlik keltirib chiqaradigan va xunuk ko‘rinadigan holat. Estetik jihatdan ham bir harfning yoniga vergul qo‘yish xunuk ko‘rinadi, — dedi Eldor Asanov.
Bloger Shahnoza Soatova alifbo masalasida va nihoyat qandaydir mantiqiy nuqta qo‘yilishi kerakligini taʼkidladi.
Alifbo masalasi kun tartibiga chiqqanidan bir jihatdan xursandman. Chunki anchadan beri bu mavzuda gapirib kelamiz. Va nihoyat qandaydir mantiqiy nuqta qo‘yilishi kerak.
Amaliyotda lotin yozuviga asoslangan o‘zbek alifbosidan foydalanib kelayotganlar biladi, bir qancha noqulay xarflarimiz bor. Ulardan biri vatanimiz nomida birinchi bo‘lib keladigan O‘ harfi, qolaversa, G‘ harfi, undan keyin qo‘sh harflarimiz bor.
Bu mavzu ilk marta ko‘tarilganiga besh yillar bo‘ldi. Tashqaridan qaraganda ikkita belgini o‘zgartirish juda oson. Masalan, 2016-yilda qoraqalpoq alifbosida o‘zgargan va hozirda foydalanib kelinmoqda. Biz ham bu muhim qadamni qo‘yishimiz kerak, deyapmiz. Prezident aytdilar, prezident yordamchisi nutqida ham shu mavzu ko‘tarildi, — deydi bloger.
Tilshunos olim Orif Tolib o‘z Telegram kanalida o‘zgarishlar chala-yarim qilinmasdan, hech qursa, shu 4 harf to‘liq tarkibda ixchamlashuvidan umid qilayotganini taʼkidlagan.
Izoh (0)