O‘zbekistonning ikki viloyati va Qoraqalpog‘istondagi metan zapravkalar faoliyatiga cheklov o‘rnatildi. Bu haqda ma’lumot bergan mas’ullar tabiiy gazni birinchi navbatda aholi va ijtimoiy soha obyektlariga yetkazib berish maqsad qilingani bilan izohlagan.
Havo haroratining keskin sovib ketishi tufayli tabiiy gazni birinchi navbatda aholi xonadonlari, elektr energiya ishlab chiqaruvchi korxonalar hamda ijtimoiy soha obyektlari (maktab, bog‘cha, shifoxona va boshqalar)ga yetkazib berish choralari ko‘rilmoqda. Yuqoridagilardan kelib chiqib, viloyatdagi mavjud avtomobillarga gaz to‘ldirish kompressor shoxobchalariga tabiiy gazni yetkazib berish joriy yilning 4-dekabridan har kunlik ertalab soat 06:00 dan — soat 15:00 ga qadar belgilandi, — deydi viloyat hokimligi axborot xizmati mas’ullari bergan ma’lumotda.
Mas’ullar viloyatdagi zapravkalar faoliyatida o‘zgarishlar kuzatilsa, qo‘shimcha ma’lumotlar berilishini bildirgan.
Surxondaryo viloyati hokimligi axborot xizmatining xabar berishicha, viloyatdagi gaz zapravkalari tonggi 08:00 dan soat 17:00 gacha faoliyat yuritadi. Shuningdek, Qoraqalpog‘iston Respublikasidagi zapravkalar ham tun-u kun rejimidan soat 6:00 dan 15:00 gacha ishlash rejimiga o‘tdi.
“Daryo” jurnalistining kuzatuvlariga ko‘ra, poytaxtdagi metan zapravkalarda ham turnaqator navbatlar yuzaga kelgan bo‘lib, tadbirkorlarga kunning ma’lum qismida ishlashga ruxsat berilgan. Aksariyat zapravkalar soat 15:00 dan keyin, ayrimlari 17:00 dan keyin faoliyat yuritmayapti. Biroq hozircha mas’ullar bu holatni izohlamagan.
Avvalroq Farg‘onada tez yordam mashinalari metan gazda navbat kutishga majbur bo‘lgani uchun mas’ullarga chora ko‘rilgani haqida xabar berilgandi. Energetika vaziri Jo‘rabek Mirzamahmudov “Daryo” nashriga bergan intervyusida joriy yilgi qish mavsumida benzin va metan gazi yetarli bo‘ladimi, degan savolga javob berib, “metan zapravkalarda qandaydir taqchillik kuzatilsa, o‘sha hajmga teng ravishda benzinni qo‘shimcha ravishda bozorga isteʼmol uchun chiqaramiz”, degandi.
Izoh (0)