Польша чегарасида навбатда турган украиналик ҳайдовчиларнинг ўлимидан кейин Киев Варшавага нота юборди

Украина — Польша чегарасидаги “Корчева” назорат-ўтказиш пункти олдида навбатда турган иккинчи ҳайдовчининг ўлими маълум бўлгач, Украинанинг Польшадаги элчихонаси Польша Ташқи ишлар вазирлигига украиналик юк ташувчилар учун чегарани очиш талаби билан нота юборди. Бу ҳақда дипломатик миссия раҳбари Василий Зварич маълум қилди.

Чегарадаги навбат польшалик юк ташувчиларнинг 6 ноябрдан бери давом этаётган норозиликлари ортидан юзага келган.

Украина элчихонаси ҳолат юзасидан Польша маъмурияти ва Ички ишлар вазирлиги билан ҳам боғланди.

Польшалик намойишчилар томонидан юк ташишни чеклаш одамларнинг ҳаёти ва соғлиғига таҳдид солмоқда, шунингдек, умумий фойдаланишдаги йўлларда ҳаракат хавфсизлиги ва тартибига жиддий таҳдид келтириб чиқармоқда. Ҳар ким норозилик билдириш ва ўз позициясини ҳимоя қилиш ҳуқуқига эга. Аммо қийин об-ҳаво шароитида норозилик йиғини, вақти ва давомийлиги одамларнинг ҳаёти ва соғлиғига, қолаверса, хавфсизлигига чинакам хавф туғдиради, — деб ёзди у Facebook’да.

2022 йил июнь ойида Европа Иттифоқи украиналик юк ташувчиларга тегишли ҳужжатсиз Европа Иттифоқи мамлакатларига икки томонлама ва транзит юк ташишларини амалга оширишга рухсат берганди. 2023 йил март ойида Киев ва Брюссель бу чорани 2024 йил 30 июнгача узайтирди. Қоидаларнинг енгиллаштирилиши польшалик юк ташувчиларнинг норозилигига сабаб бўлди.

6 ноябрдан бери польшаликлар Украина билан чегарадаги учта чегара ўтиш жойини тўсиб қўйган. Улар Украина юк ташувчилари учун уруш бошланишидан олдин амалда бўлган транспорт чекловларни тиклашни талаб қилмоқда. Украиналик юк ташувчиларга берилган имтиёзлар уларнинг хизматлари арзонлашишига олиб келди, бунинг натижасида европалик юк ташувчилар муаммоларни бошдан кечирмоқда.

Польшадаги норозилик намойишлари ташкилотчиларидан бири Яцек Сокул ўз кичик компанияси паркини 40 фоизга қисқартиришга мажбур бўлганини айтди. Польша томони маълумотларига кўра, Украина юк машиналари йил давомида чегарани қарийб 900 минг марта кесиб ўтган — 2022 йилнинг февралигача бу кўрсаткич йилига 180 минг марта бўлганди.

Ҳозирда намойишчилар чегарадан соатига атиги битта юк машинасини ўтказмоқда, гуманитар ва ҳарбий ёрдам, ҳайвонлар ва тез бузиладиган озиқ-овқатларни ташувчи машиналар бундан мустасно. 18 ноябрга қадар Польша — Украина чегарасида 2,8 мингга яқин юк машинаси тўпланиб қолган. Польша томонидаги блокланган назорат-ўтказиш пунктларидан бири – “Рава-Русская” олдидаги тирбандлик 21 ноябрга келиб 53 километрга етди.