“Алоҳида уй-жойни (квартира, уй, квартиранинг ёки уйнинг бир қисмини) хусусийлаштиришга розилик берган шахслар тўғрисида маълумотнома ҳамда давлат мулки объектини хусусийлаштириш учун буюртманома бериш бўйича давлат хизматларини кўрсатишнинг маъмурий регламентларини тасдиқлаш ҳақида”ги Вазирлар Маҳкамаси қарори қабул қилинди.
Ҳужжатга мувофиқ, 2024 йил 1 июлдан бошлаб хусусийлаштирилган уй-жойларга оид давлат ордерлари ва маълумотномалар туман (шаҳар) ҳокимликлари томонидан берилади.
“Тошкент шаҳар уй-жойларга давлат ордерлари ва маълумотномалар бериш маркази” ДУК Тошкент шаҳар ҳокимлиги тасарруфига ўтказилмоқда. 2025 йил 1 январга қадар ДУК тугатилади.
Қарор билан қуйидаги давлат хизматларини кўрсатишнинг маъмурий регламентлари тасдиқланмоқда:
- алоҳида уй-жойни (квартира, уй, квартиранинг ёки уйнинг бир қисмини) хусусийлаштиришга розилик берган шахслар тўғрисида маълумотнома бериш бўйича;
- давлат мулки объектини хусусийлаштириш учун буюртманома бериш бўйича.
Ушбу хизматлар ДХМ (давлат хизматлари марказлари) ва ЯИДXP орқали кўрсатилади. Ушбу давлат хизматлари бўйича йиғим ундирилмайди. Маълумотномани олиш учун сўровномага қуйидагилар илова қилинади:
- уй-жойга бўлган мулк ҳуқуқини тасдиқловчи ҳужжат;
- мулкдорнинг оила аъзоси бўлган тақдирда – қўшимча равишда ушбу фактни тасдиқловчи хужжат (мулкка эгалик қилиш ҳуқуқини тасдикловчи ҳужжат билан бирга);
- вакилнинг ваколатини тасдиқлайдиган ишончнома.
Узоғи билан 1,5 соат ичида мурожаат этувчига тегишли маълумотнома тақдим этилади.
Давлат мулки объектини хусусийлаштириш юзасидан берилган буюртманома бўйича 5 иш куни давомида мурожаат этувчига тегишли ҳолатлар текширилгандан сўнг 30 кун ичида унга қўшимча хабарнома юборилиши маълум қилинади.
Маълумот учун: вазирлик ва идоралар, маҳаллий давлат ҳокимияти органларига қарашли бўлган 3 ойдан ортиқ фойдаланилмасдан бўш турган объект уларнинг розилигисиз ижарага бериш ёки сотиш учун савдога чиқарилади.
Ҳужжат Қонун ҳужжатлари маълумотлари миллий базасида эълон қилинган ва 2023 йил 29 ноябрдан кучга кирди.
Давлат хизматларини кўрсатишдаги қулайликлар
Сўнгги йилларда давлат хизматларини кўрсатиш жараёнида 73 турдаги ҳужжат ва маълумотномаларнинг аҳолидан талаб қилиниши бекор қилинди. Шунингдек, 200 дан ортиқ тартиб-таомиллар соддалаштирилди.
Давлат хизматларини кўрсатишда талаб этиладиган ҳужжатлар сони 221 тадан 95 тага — 43 фоизга қисқартирилган. Биргина 73 турдаги ҳужжатларнинг қисқартирилиши натижасида йилига ўртача 20 миллион аҳолига қулайлик яратилди. Уларнинг 300 миллиард сўмдан ортиқ маблағи чўнтагида қолди.
Изоҳ (0)