“Alohida uy-joyni (kvartira, uy, kvartiraning yoki uyning bir qismini) xususiylashtirishga rozilik bergan shaxslar to‘g‘risida maʼlumotnoma hamda davlat mulki obyektini xususiylashtirish uchun buyurtmanoma berish bo‘yicha davlat xizmatlarini ko‘rsatishning maʼmuriy reglamentlarini tasdiqlash haqida”gi Vazirlar Mahkamasi qarori qabul qilindi.
Hujjatga muvofiq, 2024-yil 1-iyuldan boshlab xususiylashtirilgan uy-joylarga oid davlat orderlari va maʼlumotnomalar tuman (shahar) hokimliklari tomonidan beriladi.
“Toshkent shahar uy-joylarga davlat orderlari va maʼlumotnomalar berish markazi” DUK Toshkent shahar hokimligi tasarrufiga o‘tkazilmoqda. 2025-yil 1-yanvarga qadar DUK tugatiladi.
Qaror bilan quyidagi davlat xizmatlarini ko‘rsatishning maʼmuriy reglamentlari tasdiqlanmoqda:
- alohida uy-joyni (kvartira, uy, kvartiraning yoki uyning bir qismini) xususiylashtirishga rozilik bergan shaxslar to‘g‘risida maʼlumotnoma berish bo‘yicha;
- davlat mulki obyektini xususiylashtirish uchun buyurtmanoma berish bo‘yicha.
Ushbu xizmatlar DXM (davlat xizmatlari markazlari) va YIDXP orqali ko‘rsatiladi. Ushbu davlat xizmatlari bo‘yicha yig‘im undirilmaydi. Maʼlumotnomani olish uchun so‘rovnomaga quyidagilar ilova qilinadi:
- uy-joyga bo‘lgan mulk huquqini tasdiqlovchi hujjat;
- mulkdorning oila aʼzosi bo‘lgan taqdirda – qo‘shimcha ravishda ushbu faktni tasdiqlovchi xujjat (mulkka egalik qilish huquqini tasdiklovchi hujjat bilan birga);
- vakilning vakolatini tasdiqlaydigan ishonchnoma.
Uzog‘i bilan 1,5 soat ichida murojaat etuvchiga tegishli maʼlumotnoma taqdim etiladi.
Davlat mulki obyektini xususiylashtirish yuzasidan berilgan buyurtmanoma bo‘yicha 5 ish kuni davomida murojaat etuvchiga tegishli holatlar tekshirilgandan so‘ng 30 kun ichida unga qo‘shimcha xabarnoma yuborilishi maʼlum qilinadi.
Maʼlumot uchun: vazirlik va idoralar, mahalliy davlat hokimiyati organlariga qarashli bo‘lgan 3 oydan ortiq foydalanilmasdan bo‘sh turgan obyekt ularning roziligisiz ijaraga berish yoki sotish uchun savdoga chiqariladi.
Hujjat Qonun hujjatlari maʼlumotlari milliy bazasida eʼlon qilingan va 2023-yil 29-noyabrdan kuchga kirdi.
Davlat xizmatlarini ko‘rsatishdagi qulayliklar
So‘nggi yillarda davlat xizmatlarini ko‘rsatish jarayonida 73 turdagi hujjat va maʼlumotnomalarning aholidan talab qilinishi bekor qilindi. Shuningdek, 200 dan ortiq tartib-taomillar soddalashtirildi.
Davlat xizmatlarini ko‘rsatishda talab etiladigan hujjatlar soni 221 tadan 95 taga — 43 foizga qisqartirilgan. Birgina 73 turdagi hujjatlarning qisqartirilishi natijasida yiliga o‘rtacha 20 million aholiga qulaylik yaratildi. Ularning 300 milliard so‘mdan ortiq mablag‘i cho‘ntagida qoldi.
Izoh (0)