ДХХ Қорақалпоғистон Республикаси, Самарқанд ва Фарғона вилоятларида ноқонуний ер савдоларига чек қўйди.
Жумладан, ДХХнинг Қорақалпоғистон Республикаси бўйича бошармаси томонидан департамент ҳамда ички ишлар ҳудудий бошқармалари билан ҳамкорликда тезкор тадбир ўтказилган. Тадбирда Тўрткўл туманида яшовчи шахс фуқарога 30 йил муддатга деҳқончилик қилиш мақсадида ажратилган тумандаги 1,8 гектар ер майдонини унинг номига расмийлаштириб бериш эвазига 350 миллион сўм олган вақтида ушланган.
Самарқанд вилоятида ўтказилган тадбирда эса Оқдарё туманида яшовчи фуқаро ўзи фаолият юритиб келаётган фермер хўжалигига тегишли 20 сотих ер майдонини 40 минг доллари эвазига сотишга келишиб, мазкур пул маблағини олган вақтида қўлга олинган.
Фарғона тумани яшовчи фуқаро мазкур туманда жойлашган, туман ҳокимлиги захирасидаги ер майдонидан 1 гектарини харидорга 28 минг долларга сотишни ҳамда ушбу ер майдонини мансабдор танишлари орқали расмийлаштириб беришни ваъда қилган. Натижада, у мазкур ер майдони учун пул маблағини олган вақтида ушланган.
Аввалроқ Сирдарёда беш гектар ер майдонини 40 минг АҚШ долларига сотишга уринган опа-ука қўлга олинган эди. Апрель бошларида эса Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Қорақалпоғистон Республикаси ва Бухоро вилоятида ер майдонлари савдоси билан боғлиқ фирибгарлик ҳолатлари фош этилганди.
Изоҳ (0)