Андижон вилояти Қўрғонтепа туманидаги Мурувват уйида олти ярим ёшли сиам эгизаклари тарбияланмоқда. YouTube’даги UzGlobal TV канали, шунингдек, «Зўр-ТВ» телеканали бир танада яшайдиган Фотима ва Зуҳра ҳақида репортаж тайёрлади.
Маълум бўлишича, Фотима ва Зуҳра алоҳида эмас, балки сиам эгизакларини билган онаси улардан туғруқхонадаёқ воз кечган. Қизалоқлар тўрт ёшгача Тошкентдаги махсус мурувват уйида тарбияланган. Қўрғонтепага кўчирилганига эса икки йилдан ошган.
Эгизаклар рақсга тушиш ва расм чизишни яхши кўради — Фотима ўнг қўли билан чизган расмни Зуҳра чап қўлида бўяйди. «Қизалоқлар кўпроқ уй ва оилани тасвирлайди. Бу бежизга эмас, чунки ота-онасини жуда ҳам кўргиси келади», — дейилади лавҳада.
«Ая, уйга олиб кетинг, дейман. Айтгандингиз-ку, дейман. Менга ваъда бериб қўйганди аям. Кетгим келяпти уйимга», — дейди Зуҳра ва туғилган кунида онаси келишига ишонади. Бошловчининг: «Онангизни соғинасизми?», деган саволига эгизаклар: «Ҳа», дейди, «Дадангизни-чи?», деган саволга эса Зуҳра: «Дадам йўқ», деб жавоб беради.
«Бу қизлар муассасага олиб келинганида жуда кичкина эди. Ҳозир анча катта бўлиб қолишди. Бир-бирига меҳрибон, сира урушмайди. Кўпроқ ёзиш, қоғоз бўяшни яхши кўришади. Макаронни жуда яхши кўришади, ош ва кашани ҳам севиб истеъмол қилишади. Ширинликлардан айниқса новвотни ёқтиришади», — дейди муассаса тарбиячиларидан бири.
Эгизаклардан бири бетоб бўлиб қолса, бу иккинчисига ҳам таъсир қилади, лекин камдан кам касал бўлишади; ҳозир аҳволлари яхши, соғлом улғайишмоқда. Таъкидланишича, ушбу сиам эгизакларини жиддий жарроҳлик амалиёти кутмоқда — улар бир-биридан ажратилса ҳам яшаб кетиши эҳтимоли бор, деб ҳисобланмоқда.
Уларни операция қилсак бўлади, деяпти. Уларнинг ҳамма органлари — қўли, оёғи, юраги, ошқозони иккитадан, аммо жинсий аъзоси битта. Улар келажакда яшаб кетиши мумкин, дейиляпти.Бошловчининг: «Ким биринчи уйғонади, Фотимами, Зуҳрами?», деган саволига эгизаклар: «Бир вақтда уйғонамиз», деб жавоб беради. «Тўполончи эмасмисизлар?», деган саволга: «Йўқ, тўполончи эмасмиз», дейди қизлар. Лавҳада таъкидланишича, улар ухлаётганида ҳар 20 дақиқада — бири толиқса, иккинчиси билан ўрин алмашади.Фотима билан гаплашсангиз, у лидерлик қиламан, дейди, Зуҳра билан гаплашсангиз, у ҳам лидерлик қиламан дейди. Нега десангиз, уларнинг ҳаётга қизиқиши ҳам, интилиши ҳам кучли.
Келажагини ҳам гапириб беради — ким бўлишини айтади, ким бўласиз деб сўрасангиз, доктор, тиббиёт ходими бўламан дейди.
Хуршидахон Халилова, Қўрғонтепадаги Мурувват уйи директори
Мавзуга доир: Самарқанддаги сиам эгизаклари вафот этди
Изоҳ (0)