“Ўзгидромет” кучли ёмғир ёғиши, сел-сув тошқини хавфидан огоҳлантирди

“Ўзгидромет” ҳафтанинг биринчи ярмида кучли ёмғир ёғиши, сел-сув тошқини хавфидан огоҳлантирди.

Маълум қилинишича, 21—23 ноябрь кунлари Ўзбекистон ҳудудига нам ва совуқ ҳаво массалари кириб келиши кутилмоқда.

21 ноябрь кунлари Қорақалпоғистон Республикасида, Хоразм, Бухоро, Навоий вилоятларида, 22 ноябрда республиканинг катта қисмида, 23 ноябрда Фарғона водийси вилоятларида ёмғир ёғади.

22 ноябрда Тошкент, Самарқанд, Жиззах, Сирдарё, Қашқадарё вилоятларида, 23 ноябрда Фарғона водийси вилоятларида баъзи жойларда кучли ёмғир ёғади. 22—23 ноябрда республиканинг тоғли ҳудудларида ёғингарчилик (ёмғир, қор), баъзи жойларда кучли бўлади.

Республика бўйича баъзи жойларда шамол тезлиги15-20 метр/секундгача кучайиши кутилмоқда, 22-25 метр/секундгача кучайиши мумкин, айрим жойларда чанг-тўзонлар билан кузатилади.

Ҳаво ҳарорати кундуз кунлари 10-15 даражагача, кечалари 3-6 даража илиққача пасаяди, шимолда 1-3 даража совуққача бўлиши мумкин.

22—23 ноябрда республиканинг тоғолди ва тоғли ҳудудларида сел-сув тошқин ҳодисалари юзага келиши мумкин.