Тошкентда тез ёрдам чақирувига кўра келган ходим бемор аёлга уятсиз ҳаракатлар қилгани айтилмоқда. Бу ҳақда журналист ва блогер Шаҳноза Соатовага хабар берди.
“Шу пайшанба — 16 ноябрдан 17 га ўтар кечаси тоби қочган, тез ёрдам чақирган. Ёлғиз ўзи ёш боласи билан яшагани ва кечқурун бўлгани учун иложи бўлса, аёл шифокор сўраган. Лекин икки соатда ҳам аёл шифокор топилмагани учун тунги соат 00:15 да эркак шифокор бир ўзи кириб келган. Учта шприцда укол қилган. Охиргисини қилаётган пайтдаёқ аёл ўзини ғалати ҳис қила бошлаган”, — деб ёзади Соатова.
Журналистнинг айтишича, унга мурожаат қилган аёл ўзининг таниши бўлиб, университетда дарс беради, кичик ёшдаги ўғли билан бирга ёлғиз яшайди.
“Тез ёрдам шифокори аёлнинг ожизлигидан фойдаланиб, унга ножўя қилиқлар қилган, қўли билан жинсий зўрлаган. Яна кўпроқ ишлар қилмоқчи бўлган-у, аёл ҳоли борича қаршилик қилавергач, ниҳоят кетган. Аёл эртаси кечгача хаёли ўзида бўлмаган, кечга бориб, нима бўлганини англаб, бонг ура бошлаган. Лекин 102 га қўнғироқ қилингач, етиб келган участка нозири етарли тезкорлик кўрсатмаган, аёлга “барибир исботлашингиз қийин”, деб мурожаатидан воз кечишга ундаган. Аёл қатъият кўрсатгач, судмедекспертизага йўлланма берган. Бу жума кечқурунги гап”, — дейди журналист.
Унинг қайд этишича, аёл суд тиббий экспертизага борган, иш куни тугаб қолгани учун иши битмаган.
“Эртаси шанба ҳам шу аҳвол. Судмедекспертиза, наркологияга бориб вақти зое кетган (қизиқ, улар ҳафтада 5 кун соат 4 гача ишласа, бошқа вақтларда қилинган жиноят излари душанбагача кутииб ўтирадими?) Участковой эса ҳамон “барибир исботлай олмайсиз” позициясида, шекилли, етарли ҳаракат қилмай, аксинча, аризани қайтариб олиш ҳақида гап очяпти нуқул. Тез ёрдам қолдириб кетган шприцлардаги модда қолдиқларини ҳам ҳеч ким эътиборга олмаяпти. Порталга қилинган қўнғироқлар, мурожаатлар охиригача эшитилмай қўйиб қўйиляпти. Аёл ишонмаяпти адолатга, лекин уни топмоқчи, шундан жуда жонсарак”, — деди Шаҳноза Соатова ва Ички ишлар вазирлиги масъуллари, соғлиқни сақлаш вазири Амрилло Иноятовга мурожаат қилиб, улардан бу масалага эътибор қаратишни сўради.
ССВ матбуот хизмати раҳбари Фурқат Санаевга кўра, вазият назоратга олинган. “Бу очиқ қоладиган масала эмас”, — деган у “Газета.уз”га берган изоҳида. Республика тез тиббий ёрдам маркази матбуот котиби Ирода Мирзабекова иш билан шахсан шуғулланаётганини билдирган.
Унинг сўзларига кўра, чақириққа борган тез тиббий ёрдам фелдшери О.М.нинг иш фаолияти юзасидан хизмат текшируви тайинланган. Мурожаатда беморга учта укол қилингани айтилган ҳолат бўйича эса ишчи гуруҳ экпертиза ўтказади.
Изоҳ (0)