Бугун, 3 ноябрь куни UzAutoMotors оммабоп моделлар — Cobalt, Damas, Labо ва бошқа автомобилларига дилерлик марказларида шартнома бериш бошланганини эълон қилди. Сотувлар доимгидек бир неча соатларда автосалонлардаги узун навбатлар, ур-йиқит, тўполон билан ўтди.
Ижтимоий тармоқларда аҳолининг автосалонлардаги тартибсизликлари акс этган видеолар тарқалди. Сотув бошлангани айтилгач, “Дарё” мухбири ҳам Тошкент шаҳридаги автосалонлардан бирида бўлиб, жараённи ўрганди.
Компания сотув бошлангани ҳақидаги эълонни соат 9:40 да берган бўлса, орадан уч ярим соат ўтиб, шартнома тузиш тўхтатилди. Ўтган вақт ичида навбатга ёзилганлардан шартнома тузишга эришганлар сони 100 тага ҳам етмади.
Самарқандлик Ҳазратқул Жўраев Тошкентдаги автосалонга беш кун қатнаб, ахийри Cobalt’га шартнома тузганини айтди.
“Душанба куни соат 9:00 да автосалонга бордим. Ҳали шартномалар берилмаяпти, кутинг дейишди. Кун бўйи — соат 18:00 гача кутдим, сотув бошланмади. Кейин эртасига ҳам кута-кута уйга қайтдим. Чоршанба, пайшанба кунлари ҳам шундай вақт ўтказдим. Ва ниҳоят, мана жума куни шартнома беришди. Эрта тонгда келиб, Cobalt’га шартнома туздим. Жуда хурсандман, уйдаги яқинларим байрам қилишяпти”, — деди у.
Фуқаролардан бирининг айтишича, автосалонга келганларнинг кўпчилиги автомобилни сотиш учун харид қилмоқда. Улар бир вақтнинг ўзида ўнлаб автомобилларга шартнома тузади. Оқибатда машина ҳайдаш учун олишни истаган оддий аҳолига навбат тегмайди.
“Авваллари салондан олинган янги автомобилни бир йил ичида сотишга рухсат берилмасди. Ўша тўғри қарор эди. Чунки ҳозир кўпчилик машина сотиб олаётганлар бозорда пуллаш учун харид қилмоқда. Оқибатда оддий аҳоли автомобиль олишдан маҳрум бўляпти”, — деди исмини сир тутишни истаган манба.
Шартномалар бериш бошланган пайтда компания иловаси ишламай қолди. Яъни иловада сотувдаги автомобилларни кўриш имкони бўлмади. Расмий бот ҳам, компания сайти ҳам тошдек қотди. Одамларда фақатгина автосалонларга бориб машина сотиб олиш имкони қолган, бу ҳам бўлса, таваккал ва амалга ошиши амримаҳол иш. Чунки машина сотиб олиш учун салонга келганларнинг ярмидан кўпи уйига қуруқ қўл билан қайтди.
Аввалроқ 18 сентябрь куни ҳам Cobalt, Lacetti, Damas ва Labо автомобиллари учун контрактация очилгани хабар қилинганди. Унда ҳам шартномалар бериш бошланиши эълон қилгандан сўнг автосалонларда навбатлар юзага келган ва сотув жуда тез якунланган.
Изоҳ (0)