Қашқадарё вилоятидаги тижорат банклари томонидан ажратилган кредитларнинг салкам 800 миллиард сўми муаммоли кредитлар ҳисобланади. Бу ҳақда “Қашқадарё” газетаси хабар берди.
Маълумот берилишича, вилоятда тижорат банклари томонидан ажратилган кредитларнинг 10 мингдан ортиғи муаммоли кредитлар бўлиб, уларнинг умумий ҳажми қарийб 755 миллиард сўмни ташкил этади. 2023 йилнинг охиригача бундай кредитлар сонини 8 минг 285 тагача, миқдорини эса 414,5 миллиард сўмгача қисқартириш мўлжал қилинган.
Халқ депутатлари вилоят кенгаши “Қашқадарё вилоятидаги банклар томонидан ажратилган кредитлар қайтими ҳамда мавжуд муаммоли кредит қарздорликларни ундириш ишларини жадаллаштириш чора-тадбирлари тўғрисида” қарор чиқариб, президент Шавкат Мирзиёевнинг муаммоли кредитларни қисқартириш бўйича берган топшириғи ижросини таъминлашга киришган.
Қайд этилишича, 2023 йилнинг 26 октябрь куни қабул қилинган мазкур ҳужжатга кўра, вилоятда муаммоли кредитларнинг энг кўпи Қамаши (1 минг 351 та) ва Деҳқонобод (1 минг 132 та) туманларига тўғри келган. Ҳажм жиҳатидан эса Қарши шаҳри (185,8 миллиард сўм) ва Қарши тумани (қарийб 140 миллиард сўм) олдинда.
Банклар кесимида эса энг кўп миқдордаги муаммоли кредитлар “Асакабанк” (128,4 миллиард сўм), “Агробанк” (125,9 миллиард сўм) ва “Микрокредитбанк” (98,9 миллиард сўм)да йиғилиб қолган.
Кенгаш қарорига биноан, тижорат банклари томонидан ажратилган кредитларни, шу жумладан, мавжуд муаммоли кредит қарздорликларни ундириш бўйича Қашқадарё вилояти ишчи гуруҳи таркиби (раҳбари вилоят ҳокимининг биринчи ўринбосари А.Қодиров), шунингдек, ҳар бир шаҳар ва туманга бириктирилган тегишли мутасадди ташкилот раҳбарлари рўйхати тасдиқланди. Ишчи гуруҳ аъзолари орасида банк соҳаси мутасаддиларидан ташқари, вилоят прокуратураси, иқтисодий ва фуқаролик судлари, солиқ, адлия, божхона, камбағалликни қисқартириш ва бандлик, ИИБ йўл ҳаракати хавфсизлиги, иқтисодий жиноятларга қарши курашиш департаменти, мажбурий ижро бюроси, Савдо-саноат палатаси, Кадастр агентлиги вилоят бошқармаларининг масъул шахслари ҳам бор. Уларга судларга даъво аризаларини киритиш, судларнинг иш юритувида бўлган ҳужжатлар бўйича тезкор қарор қабул қилиш, мавжуд ижро варақалар ижросини жадаллаштириш, жиноят аломатлари мавжуд бўлган кредитлар бўйича таъсир чораларини қўллаш ҳамда кредитларни ундириш борасида ўзларига юклатилган бошқа вазифаларнинг бажарилишини таъминлаш топширилган, — дейилади нашр хабарида.
Вилоятда жорий йил якунига қадар ҳамда 2024 йилда кредитларни сўндириш графиклари ҳам тасдиқланган. Жорий йилнинг охирги чорагида тижорат банкларининг сал кам 1,7 триллион сўм, 2024 йил давомида эса 7,8 триллион сўм ҳажмдаги кредитлари сўндирилиши зарур.
Изоҳ (0)