Ўзбекистонда 2023 йилнинг сентябрь ойида кредит фоиз ставкалари ўсди. Бу ҳақда Марказий банк хабар берди.
Миллий валютадаги кредитлар
Сентябрь ойида аҳоли учун миллий валютадаги банк кредитларининг ўртача тортилган ставкаси 24,2 фоизни ташкил этди. Бу сўнгги уч йил ичидаги энг юқори кўрсаткичдир. Кредит ставкалари январь ойидан бери 1,2 фоизга, 2022 йил сентябрьдан буён 1,4 фоизга ўсди.
Тадбиркорлик субъектларига эса кредитлар 21,6 фоиздан ажратилган. Йил бошида бу кўрсаткич 21,5 фоиз бўлган. Ўтган йилнинг мос даврида йиллик тортилган фоиз ставкалари 21,9 фоизни ташкил этган.
Чет эл валютасидаги кредитлар
Сентябрда хорижий валютадаги кредитлар узоқ муддатга 8,8 фоиздан ажратилган бўлиб, йил бошидан бери 0,7 фоизга ўсган. Ушбу турдаги кредитлар ўтган йилнинг сентябрь ойида 7,1 фоиздан берилган бўлиб, бир йил давомида 1,7 фоиз ўсиш кузатилган.
Сентябрьда қисқа муддатга ажратилган хорижий валютадаги кредитлар 9,7 фоиздан берилган. Йил бошида бу кўрсаткич 8,3 фоиз, ўтган йилнинг мос даврида эса 7,5 фоизни ташкил этган.
Миллий валютадаги омонатлар
Ўтган ойда миллий валютадаги депозитларнинг ўртача тортилган фоиз ставкалари жисмоний шахслар учун 21,1 фоизни ташкил этди. Август ойида омонатлар 21,7 фоиздан қабул қилинган. Январда бу кўрсаткич 20,5 фоиз, ўтган йилнинг сентябрида 20,6 фоиз бўлган.
Юридик шахслар учун миллий валютадаги депозитлар ставкалари 16,8 фоиз бўлди. Йил бошида бу кўрсаткич 16,7 фоизни, ўтган йилнинг мос даврида 16,2 фоизни ташкил этган.
Чет эл валютасидаги депозитлар
Сентябрда жисмоний шахслар учун чет эл валютасидаги омонатлар йиллик 4,9 фоизни ташкил этди. Йил бошида бу кўрсаткич 4,3 фоиз, 2022 йил сентябрда 4 фоиз бўлган.
Юридик шахслардан хорижий валютадаги омонатлар 4,2 фоиздан қабул қилинган. Бу кўрсаткич йил бошида 3,3 фоизни, ўтган йилнинг сентябрь ойида 3 фоизни ташкил этган.
Аввалроқ Ўзбекистонда кредит ставкаларини 7 йил ичида 10 фоизгача пасайтириш режалаштирилгани хабар қилинганди.
Изоҳ (0)