Ўзбекистонда 2023 йилнинг октябрь ойида истеъмол секторидаги товарлар ва хизматлар ўртача 1 фоизга ошди. Бу ҳақда Статистика агентлиги хабар берди.
Маълумотларга кўра, октябрь ойида истемол нархлари индекси таркибида озиқ-овқат маҳсулотлари нархлари ўртача 1,3 фоизга, ноозиқ-овқат товарлари 1 фоизга ва аҳолига пуллик хизматлар кўрсатиш нархлари ўртача 0,7 фоизга ошгани кузатилган.
Истеъмол секторидаги нархларнинг йиллик ўсиш даражаси 9 фоизга етган. Йил бошидан буён истеъмол секторидаги нархлар индекси ўртача 6,2 фоизга ўсган.
Марказий банк 2023 йил якуни бўйича инфляция даражаси 8,5–9,5 фоиз атрофида бўлишини прогноз қилганди. 2022 йилда йиллик инфляция 12,3 фоизни ташкил этган. 2021 йилда бу кўрсаткич 9,98 фоиз, 2020 йилда 11,1 фоиз, 2019 йилда 15,2 фоиз, 2018 йилда 14,3 фоиз, 2017 йилда 14,4 фоиз бўлган.
Инфляция ўзи нима?
Инфляция деганда мамлакатдаги товар ва хизматлар баҳоси умумий даражасининг ошиши (ўсиши) тушунилади. Унинг асосий кўрсаткичи истеъмол нархларининг маълум бир даврдаги ўзгариши ҳисобланади. Нархларнинг умумий даражаси кўтарилиши натижасида мамлакат пул бирлиги (миллий валюта) харид қобилиятининг пасайиши рўй беради. Бу эса ўз навбатида, давлат пул бирлигининг қадрсизланишига олиб келади.
Изоҳ (0)