Бугунги кундаги вазият ўзбек сўми ўрнига янги валюта ишлаб чиқиш заруриятини тақозо этмаяпти. Бу ҳақда 26 октябрь куни журналистлар билан бўлган мулоқотда Марказий банк раиси Мамаризо Нурмуродов маълум қилди, дея хабар бермоқда “Дарё” мухбири.
Мамаризо Нурмуродовнинг айтишича, пул қадрини оширадиган бош омил — иқтисодий ўсишдир.
“Курсни долларга нисбатан қадрсизланиб, жуда ошиб кетиши кутилмаяпти. Агар ўтган 9 ойлик даврни таҳлил қилсак, долларнинг қадрсизланиши 8,3 фоизни ташкил этди. Инфляциямиз эса 9,2 фоизга тенг бўлди. Мана бу ҳақиқатан ҳам бизни ўйлантирадиган, асосий мақсадимиз йўналтирилган масаладир.
Бир нарсани тўғри тушуниш керак, пулни алмаштирган билан унинг қадри ошиб қолмайди. Яъни биз иқтисодиётда маълум бир ижобий ўсишлар, ўзгаришларга эришмасак, валюта курсига таъсир кўрсата олмаймиз. Пулни алмаштириш — техник ҳолат. Бугунги кундаги вазиятимиз, келгусидаги режаларимиз ҳам буни тақозо этаётгани йўқ. Яқин, ўрта ва узоқ истиқболда ҳам бу масала кўзда тутилмаяпти”, — деди Марказий банк раиси.
Аввалроқ Мамаризо Нурмуродов ўзбек сўми йилига 6–7 фоизга қадрсизланаётганини айтганди.
“Ўзбекистонда 2017 йилдан, яъни валюта бозори эркинлаштирилганидан бери бугунги кунгача бўлган валюта курсининг ўзгаришини таҳлил қилсак, кўплаб давлатлардаги валюта қадрсизланишидан биздагиси анча паст. Шу нуқтаи назардан 4 йилдан ортиқ вақт давомида миллий валютамиз ўртача 6–7 фоизга қадрсизланяпти. Бу дегани инфляция 10 фоиздан юқори бўлаётган шароитда валюта қадрсизланиб кетяпти, дейишга ҳеч қандай асос йўқ. Иқтисодий ўсишлар ҳам шу курснинг меваси. Бир доллар 11 500 сўм бўлгани учун ўзбек сўми кучсиз валюта дейишга ҳеч қандай асос йўқ”, — деган эди у.
Изоҳ (1)
ўзгартирасилами йўқми буни халқга қизиғи йўқ. Лекин одамлар яхши яшаётган, бебирска пул сочаётганларни кўриб алам қилади. Боласига бир иссиқ кийим олишга қийналади. Ўқилар дейсизлар ку лекин саводсизлар рахбар, блогер, тадбиркор бўлиб юрибди. Ўқиганлар эса арзимаган ойликга ишлаб юрибди. Соддалигидан ўзини кўрсата олмиятганлари қанча.