Россияда 30 октябрда нишонланадиган Сиёсий маҳбуслар кунида қамоқ жазосини ўтаётган қатор россиялик сиёсатчилар бир кунлик очлик эълон қилди. Бу ҳақда DW нашри хабар бермоқда.
Ушбу ташаббус октябрь ойи бошида Коррупцияга қарши кураш фонди асосчиси Алексей Навалний томонидан илгари сурилганди. Акцияга Илья Яшин, Владимир Кара-Мурза, Лилия Чанишева, Даниел Холодний ва Вадим Останин ҳам қўшилиб, Навалний сайтида эълон қилинган мурожаат матнига имзо чекди. Очлик эълон қилишда сиёсий фаол Михаил Кригер ҳам иштирок этгани айтилмқда.
Алексей Навалнийнинг чақириғини қўллаб-қувватлаган сиёсатчилар овқатланишдан бош тортишга муваффақ бўлган-бўлмагани ҳозирча номаълум. Россия колониялари раҳбарияти 30 октябрь куни очлик эълон қилган сиёсатчиларни тўхтатишга уринган: совет даврида бу санада овқат ейишдан бош тортганлар жазо камерасига юборилар эди.
Айни пайтда, “Мемориал” инсон ҳуқуқлари ташкилоти маълумотларига кўра, Россияда сиёсий маҳбуслар ёки диний эътиқоди туфайли таъқибга учраганлар сони 600 кишидан ошган. “Мемориал” ҳисоботига кўра, 2014 йил бошидан буён бу 15 баробарга ўсди. Ҳуқуқ ҳимоячилари эса, уларнинг ҳисоб-китобларидан юзлаб одамлар четда қолган бўлиши мумкинлигидан огоҳлантирди.
Изоҳ (0)