Чеченистон раҳбари Рамзан Қодиров 2024 йилда бўлиб ўтадиган Россия президенти учун сайловни “махсус ҳарбий операция” (Россия расмийлари Украинага босқинни шундай атайди) туфайли вақтинча бекор қилишни таклиф қилди. Бу ҳақда Қодиров Грознийда Владимир Путиннинг туғилган кунига бағишланган флешмоб чоғида айтди.
“Мен ҳозир, МҲО давом этаётганда, бир овоздан сайловда битта номзод бўлиши ҳақида қарор қабул қилишни таклиф этаман — Владимир Владимирович Путин. Ёки сайловларни вақтинча бекор қилинг, чунки бугун мамлакатимизни ҳимоя қила оладиган бошқа одам йўқ”, — деди Қодиров.
Владимир Путин 7-октябр куни туғилган кунини нишонлади, у 71 ёшга тўлди.
Путин 2024 йилги сайловларда иштирок этиши ҳақида ҳали расман эълон қилмаган. Бироқ, Meduza манбаларига кўра, Кремлдагилар унинг қайта сайланишини тахмин қилмоқда.
Россияда президентлик сайловлари 2024 йилда бўлиб ўтади. Россия президенти маъмурияти Путин сайловларда 80 фоиздан кўпроқ овоз олиши керак, деб ҳисобламоқда.
Изоҳ (0)