Мисрда 27 октябрь, жумага ўтар кечаси Исроил билан чегарага яқин Таба шаҳрига ракета ҳужуми оқибатида олти киши яраланди.
“Ғазо секторидаги вазият кескинлашаётган бир пайтда Таба шаҳрига ракета тушиб, олти киши енгил жароҳат олган”, — деб хабар берди Миср разведка хизматларига яқин AlKahera News телекомпанияси.
Гувоҳларнинг AFP’га айтишича, ракета Қизил денгиз соҳилида, Исроил билан чегара пункти яқинидаги Таба шаҳридаги касалхонага келиб тушган. Ижтимоий тармоқларда жойлаштирилган суратларда бузилган бино ва вайрон бўлган машиналар акс этган. Исроил ҳарбийлари воқеа юзасидан суриштирув олиб бораётганини айтди.
Мисрда Ғазо секторига Исроил назорат қилмайдиган ягона чегара ўтиш жойи бор. Миср узоқ вақтдан бери фаластинликлар ва исроилликлар ўртасида воситачи бўлиб келган. ҲАМАС ва Исроил ўртасидаги ҳозирги можарода ҳам тобора муҳим рол ўйнамоқда.
Бу Мисрга қилинган биринчи ракета ҳужуми эмас
Исроил мудофаа кучлари 22 октябрь куни Исроил танки Ғазо сектори чеккасида Миср постини “тасодифан” ўққа тутгани ҳақида хабар берди. Миср ҳукумати ҳам ўша пайтда одамлар “енгил жароҳат” олганини маълум қилди.
Изоҳ (0)