Хоразм вилоятида ташкил этилганига 4 кун бўлган фирма онлайн савдода қатнашиб, энг яхши натижаларни қайд этган ҳолда 1 миллиард сўмдан ортиқ маблағни осонгина қўлга киритгани хабар берилганди. Рақобатни ривожлантириш ва истеъмолчилар ҳуқуқларини ҳимоя қилиш қўмитаси Хоразм вилоят ҳудудий бошқармасининг маълумот беришича, мазкур савдо натижаси бекор қилиниши мумкин.
“Дарё”да “Хоразмда фаолият бошлаганига 4 кун бўлган фирма тендердаги 5 та танловда ғолиб бўлиб, 1 миллиард сўмдан ортиқ маблағни қўлга киритди”, сарлавҳали мақола эълон қилинганди. Шундан сўнг бошқарма мазкур ҳолатни ўрганиб чиққан.
Ўтказилган ўрганиш жараёнида Ихтисослаштирилган таълим муассасалари агентлиги тизимидаги Тупроққалъа туман ихтисослаштирилган мактаби томонидан махсус ахборот портали орқали умумий қиймати 1 миллиард 80 миллион 650 минг сўмлик 5 та энг яхши таклифларни танлаш бўйича 309495, 309740, 309744, 309821 ҳамда 309859-сонли лот рақамлари билан харидлар амалга оширилганлиги кузатилди.
Ушбу танлов савдоларида иштирокчилар таклиф ҳужжатларини баҳолашнинг балли усулидан фойдаланилган. Мазкур 5 та танловлар савдоларида иштирок қилган талабгорлар томонидан белгиланган баҳолаш мезонларига мувофиқ тегишли маълумот ва ҳужжатлар тақдим қилинган бўлса-да, барча савдоларда ғолиб деб топилган “Pitnak Sunrisе” МЧЖ ҳамда захира ғолиби деб топилган “Эко эканом” МЧЖлар бошқа талабгорларга нисбатан асоссиз равишда юқори баллар билан баҳоланган ва қолган талабгорлар асосиз равишда паст баллар билан баҳоланган ҳолда савдолардан четлаштирилган.
Вазирлар Маҳкамасининг 2022 йил 20 майдаги “Давлат харидларини амалга ошириш билан боғлиқ тартиб-таомилларни ташкил этиш ва ўтказиш тартиби тўғрисидаги низомни тасдиқлаш ҳақида”ги 276-сонли қарори билан тасдиқланган Низомнинг 96-бандида “Танлаш бўйича харид қилиш ҳужжатларида белгиланган шартлардан келиб чиқиб давлат харидларининг электрон тизими автоматик равишда танлаш таклифининг техник ва нарх қисмларини баҳолашни ҳисобга олган ҳолда энг юқори балл тўплаган иштирокчини (балл усулидан фойдаланганда) ғолиб сифатида аниқлайди”, деб белгиланган.
Шунингдек, ушбу банднинг 2-қисмида “Танлаш таклифларини балл усулидан фойдаланган ҳолда баҳолаш натижасига кўра икки ёки ундан ортиқ иштирокчилар бир хил балл тўплаган бўлса, энг паст нарх таклиф этган иштирокчи ғолиб деб топилади”, деб белгиланган, — дейилади масъуллар изоҳида.
Қўшимча қилинишича, мазкур танлов савдоларида белгиланган баҳолаш мезонларига мувофиқ тегишли ҳужжатларни тақдим қилган талабгорлар орасида энг паст нархни тақдим қилган талабгорлар ғолиб деб топилиши керак бўлган.
Юқоридагиларга асосан, ҳудудий бошқарма томонидан Ихтисослаштирилган таълим муассасалари агентлиги тизимидаги Тупроққалъа туман ихтисослаштирилган мактабига махсус ахборот порталига 309495, 309740, 309744, 309821 ҳамда 309859-сонли лот рақамлари билан жойлаштирилган эълонларга мувофиқ ўтказилган танлов савдоларини бекор қилинишини таъминлаш юзасидан тегишли сўров хати юборилди ҳамда танлов савдоларида кузатилган қонунбузилиш ҳолатлари юзасидан ҳуқуқий баҳо берилиши учун ҳужжатлар ҳуқуқни муҳофаза қилувчи органларга тақдим қилинди, — дейди масъуллар.
Изоҳ (0)