Остонада Қозоғистон биринчи президенти кутубхонаси ва Нурсултон Назарбоевнинг иш қароргоҳи бўлган бинода президентлик маркази ташкил этилди, деб хабар бермоқда Tengrinews.
Янги тузилма “мустақил Қозоғистон раҳбарларининг тарихий меросини сақлаш, ўрганиш ва тарғиб қилиш” билан шуғулланади. Унга Назарбоевнинг шахсий архиви ва шахсий кутубхонаси материаллари, шунингдек, илгари биринчи президент кутубхонасида сақланаётган музей экспонатлари топширилган. Вақт ўтиши билан амалдаги давлат раҳбари Қосим-Жўмарт Тўқаевнинг “тарихий ва маданий қадриятга эга” шахсий ҳужжатлари ва буюмлари янги марказга ўтказилади. Келгусида бу ерда Қозоғистоннинг кейинги президентларига тегишли материаллар тўпланиши режалаштирилган.
“Шу билан бирга, марказ фаолияти фақат музей ва кутубхона функциялари билан чекланиб қолмайди. Бу Қозоғистон жамиятини ташвишга солаётган энг долзарб масалаларни муҳокама қилиш учун етакчи эксперт майдончасига айланиши кўзда тутилган”, — таъкидлади президент маъмурияти.
Янги марказ ҳамма учун очиқ, кириш эса бепул бўлади.
Қозоғистоннинг собиқ раҳбари Нурсултон Назарбоев 2019 йил баҳорида истеъфога чиқишини эълон қилганидан сўнг Akordaдан кутубхона биносига кўчиб ўтганди. У ерда биринчи президент канселярияси ҳам фаолият юритган. Ўтган йилнинг ёзида молия вазири Эрулан Жамаубаев кутубхона тез орада фаолиятини тўхтатишини айтганди.
2022 йил январдаги тартибсизликлардан кейин Нурсултон Назарбоев мамлакатнинг ички ва ташқи сиёсатидаги иштирокини деярли тўхтатди. 2023 йил бошида Назарбоев кафолат ва имтиёзлардан, шунингдек, барча фахрий мақомлардан, жумладан, Элбоши (миллат етакчиси) мақомларидан ҳам маҳрум этилди.
Унинг бир қатор оила аъзолари ва унга яқин кишилар жиноий жавобгарликка тортилди, бошқалари давлат лавозимидан айрилди. 2019 йилда Назарбоев шарафига Нур-Султон деб аталган мамлакат пойтахти аввалги номи – Остонага қайтди.
Изоҳ (0)