Эрон Ўзбекистонга виза режимини бекор қилиш бўйича келишув тузишни таклиф қилди, деб хабар бермоқда Эроннинг Teheran Times нашри.
Эрон туризм вазири Иззатуллоҳ Зарғамий Самарқандда бўлиб ўтган Халқаро туризм форуми доирасида экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов билан учрашувида икки томонлама ҳамкорлик масалаларини муҳокама қилган. Хусусан, икки давлат ўртасида виза режимини бекор қилишни таклиф қилган.
“Бухорога ташриф буюрганимда бу икки халқ қанчалик яқин эканини ҳис қилдим. Биз ўзбекистонлик сайёҳларнинг Эронга келишини қўллаб-қувватлаймиз, шунингдек, хорижга саёҳат қилишни режалаштираётган эронлик сайёҳлар учун Ўзбекистон ҳам устунликка эга бўлиши керак, деб ҳисоблаймиз”, — деган у.
Шунингдек, Зарғамий ўзаро туризмни ривожлантириш учун мамлакатлар қуруқликдаги саёҳатни ривожлантириш зарурлигини таъкидлади. Бунга эришиш учун Туркманистон билан ҳамкорлик қилиш кўзда тутилмоқда.
Эрон 60 та мамлакат фуқаролари учун виза тартибини енгиллаштириш, жумладан, виза тартибини бир томонлама бекор қилиш имкониятини кўриб чиқмоқда.
2022 йилнинг октябридан Ўзбекистон—Эрон ўртасида ишбилармон ва илмий доиралар вакиллари ҳамда сайёҳлик гуруҳлари учун соддалаштирилган виза режими жорий этилганди.
Изоҳ (0)