Биноларнинг ташқи қиёфасини янгилаш аҳоли билан муҳокама қилинади — Тошкент ҳокимлиги

Тошкентнинг Ҳамид Олимжон майдонидаги “Москва” уйлари номи билан машҳур бўлган кўп қаватли уйлар реконструкция қилиниши мумкин. Бу ҳақда блогер ва журналист Никита Макаренко ўзининг Telegram канали орқали маълум қилди.

Қайд этилишича, мазкур уйда яшовчилар бир кун аввал ҳокимлик вакиллари тақдим этган биноларни реконструкция қилиш эскизларини жўнатган.

Эскизларда 8 та ойна билан ўралган 18 қаватли “Москва” кўп қаватли уйлари, шунингдек, Мустақиллик шоҳкўчаси бўйлаб жойлашган учта 9 қаватли уйларнинг таклиф этилаётган лойиҳаси тасвирланган.

Уй ширкатларидан аҳолини реконструкция режалари ҳақида хабардор қилиш сўралган. Таъкидланишича, реконструкция учун материалларнинг бир қисми аллақачон етказиб берилган, бироқ иш бошланмаган.

Аҳоли нафақат уйлар асл қиёфасини йўқотишидан, балки хонадонларда вентиляция тизими ёмонлашишидан хавотирда. Бундан ташқари, иш конструкция тузилмаларига қандай таъсир қилиши номаълум. “Иш, шунингдек, квартираларнинг эгалари сифатида аҳоли билан келишилган ҳолда бўлиши керак”, — дейди улар.

Ҳокимият: Таъмирлаш бўйича муҳокама олиб борилади

Тошкент ҳокимлиги “Газета.уз”нинг сўровига жавобан маълум қилишича, шаҳардаги 70 дан ортиқ уйлар, жумладан, муҳокама қилинаётган кўп қаватли уйларнинг қиёфасини янгилаш дастури режалаштирилмоқда.

Аҳолига тақдим этилган таклифлар пудратчи томонидан ишлаб чиқилган, бундай таклиф камида учта бўлган, бироқ ҳокимлик уларни ҳали мувофиқлаштирмаган ва маъқулламаган. Ҳокимлик бу борадаги ишлар уйларда яшовчилар билан бир қаторда архитекторлар билан ҳам маслаҳатлашилишига ишонтирди.

“Ташқи дизайн таклиф этилмоқда. Тақдимот тайёрланмоқда. Туман ҳокимлиги аҳолини йиғади. Лойиҳа муҳокама қилиниб, ҳимоя қилинмоқда”, — дейди ҳокимлик жавобида.

Аввалроқ Тошкент шаҳрида ноқонуний қурилган бино-иншоотларни бузиш бошлангани тўғрисида хабар берилганди. Қайд этилишича, шаҳар ҳокимлиги ва тегишли хизматларнинг рухсатисиз, йўллар бўйлаб қурилган бинолар аҳоли учун хавф туғдиради, яъни уларда автотураргоҳ ва тўхташ йўли йўқ, бу эса ҳайдовчининг бир дақиқалик хариди орқасидан бошқа ҳайдовчилар ва пиёдалар учун сезиларли ноқулайлик ва хавфга сабаб бўлади.