Европа Кенгаши парламент ассамблеяси (PACE) Голодоморни Украина халқининг геноциди сифатида тан олди.
“Тегишли мулоҳазаларни ҳисобга олган ҳолда, Ассамблея Голодоморни украин миллати, тили ва маданияти асосларини йўқ қилишга қаратилган геноцид акти сифатида тан олишга қарор қилади ва унинг қурбонлари хотирасига ҳурмат бажо келтиради”, — дейилади PACE қарорида.
PACE ассамблеяга аъзо давлатлар парламентларини Голодоморни геноцид деб тан олиш тўғрисидаги резолюцияларни қабул қилишга чақирди.
Украина президенти Владимир Зеленский ушбу қарори учун PACE’га миннатдорчилик билдирди:
“1932—1933 йиллардаги Голодоморни Украина халқининг геноциди сифатида тан олгани учун PACE’дан миннатдорман. Тарихий адолат ва Голодомор қурбонлари хотирасини тиклаш Москванинг ўтмишдаги ва ҳозирги жиноятлари учун адолатли жазо муқаррар эканига аниқ сигнал беради”.
Голодомор геноцид сифатида
СССРда Сталин ҳукмронлиги даврида амалга оширилган қишлоқ хўжалигини мажбурий коллективлаштириш оқибатида 1932—1933 йилларда мамлакатда оммавий очарчилик юзага келди, унинг қурбонлари миллионлаб одамларга етди. Украина бу фалокат Совет Иттифоқи раҳбарияти томонидан атайлаб қўзғатилганини таъкидлайди.
Голодомор узоқ вақтдан бери Украина ва Россия ўртасидаги асосий баҳс мавзуси бўлиб келган. Москва Киевнинг йирик очарчилик қурбони фақат украиналиклар бўлган деган фикрини рад этиб, Марказий Осиё ва Россиядаги миллионлаб одамлар ҳам очарчиликдан жабр кўрганини айтади.
2006 йилда Украина Олий Радаси Голодоморни Украина халқига қарши геноцид акти деб эълон қилган. Бир неча йиллар давомида Украина расмийлари халқаро майдонда Голодоморни геноцид сифатида расман тан олдиришга уриниб келмоқда. Уруш фонида баъзи давлатлар бу қарорни қўллаб-қувватлади.
Голодоморни Украина халқининг геноциди сифатида расман тан олган давлатлар рўйхатига АҚШ, Канада, Австралия, Португалия, Мексика, Бразилия, Франция, Исландия ва бошқалар киради.
Изоҳ (0)