АҚШ Конгрессининг Стратегик режалаштириш комиссияси 145 саҳифалик ҳисобот тайёрлади, унда Америка ҳукуматига Хитой ва Россия билан бир вақтда уруш қилишга тайёргарлик кўриш тавсия этилади, деб хабар бермоқда Reuters.
Ҳисоботни тайёрлашда иштирок этган юқори мартабали манба АҚШ разведкаси Хитой ва Россиянинг ядро қуроли бўйича ҳамкорлигига далил топган-топмагани ҳақида гапиришдан бош тортди. Суҳбатдошнинг таъкидлашича, Қўшма Штатлар иккита урушни истисно қилмайди, чунки бу икки давлат ўртасида “максимал мувофиқлаштириш” бор бўлиши мумкин.
Демократлар партияси раиси Маделин Кридон ҳисобот бўйича брифингда маълум қилишича, президент ва Конгресс “Америка халқига мудофаа харажатларини ошириш АҚШ, Хитой ва Россия иштирокида юзага келиши мумкин бўлган ядро урушининг олдини олиш учун унча катта бўлмаган тўлов экани ҳақидаги хабарни етказиши” керак.
“Қўшма Штатлар ва унинг иттифоқчилари бир вақтнинг ўзида иккала душманни ҳам тийиб туришга ва уларни мағлуб этишга тайёр бўлиши керак. АҚШ бошчилигидаги халқаро тартиб ва у тарғиб қилаётган қадриятлар Хитой ва Россия авторитар режимларининг таҳдиди остида қолган”, — дейилади ҳисоботда.
Конгресс комиссияси АҚШга одатий қуролларни яратиш, ҳарбий иттифоқларни мустаҳкамлаш ва ядровий қуролларни модернизация қилиш дастурларини кенгайтиришни таклиф қилди. Ҳисоботда айтилишича, Америка давлати молиявий ҳолатига қарамай “бундай сармояларни амалга ошириши керак”.
Комиссия Хитой ва Россия таҳдидлари 2027—2035 йилларда кучайишига ишонмоқда, шу сабабдан “мамлакатни тайёрлаш учун ҳозирданоқ қарорлар қабул қилиниши керак”.
АҚШ Конгресси комиссия 2022 йилда тузилган бўлиб, у Демократик ва Республикачилар партияларидан олти нафар вакилдан иборат. Комиссиянинг мақсади АҚШга узоқ истиқболдаги таҳдидларни баҳолаш ва мамлакатнинг оддий ва ядровий кучларига ўзгартиришлар киритиш бўйича тавсиялар беришдан иборат.
Қўшма Штатлар ва Хитой ўртасидаги муносабатлар Хитой расмийлари ўз ҳудуди деб ҳисоблайдиган Тайвандаги вазият фонида ёмонлашди. Россиянинг Украинага босқини ортидан эса АҚШ — Россия муносабатлари энг паст даражага тушди.
Изоҳ (0)