Исроил мудофаа вазири Ёав Галант Ғазо секторини тўлиқ блокадага олишга буйруқ берганини айтди. Вазирнинг сўзларига кўра, у ерга озиқ-овқат ва энергия етказиб бериш тўхтатилади.
“Мен Ғазо секторини тўлиқ блокада қилишга буйруқ бердим. Электр йўқ, озиқ-овқат йўқ, газ ҳам йўқ, ҳаммаси ёпиқ”, — деди Галант ўз видеомурожаатида.
Энергетика вазири Исроил Кац ҳукумат Ғазо секторига сув етказиб беришни ҳам тўхтатаётганини айтди.
“Мен Исроилдан келадиган сув таъминотини зудлик билан тўхтатишни буюрдим. Кеча электр ва ёқилғи таъминоти узиб қўйилганди”, — деб ёзди у Х ижтимоий тармоғидаги саҳифасида.
Исроил ва ҲАМАС ўртасидаги уруш 7-октябр куни эрталаб Исроил ҳудудига юзлаб ракеталар отилгани билан бошланган. Ғазо секторида 490 дан ортиқ одам ҳалок бўлди. Исроил 700 дан ортиқ қурбонлар ҳақида хабар берди.
The New York Times газетасининг ёзишича, Исроил разведкаси ҳужумга тайёргарлик кўрилгани ҳақида билмаган, Ғарб разведка идораларида ҳам ҳеч қандай маълумот бўлмаган. Бугун, 9-октябр куни Исроил Ғазо сектори яқинидаги шаҳарлар устидан назорат тикланганини маълум қилди.
Изоҳ (0)