Экология, атроф-муҳитни муҳофаза қилиш ва иқлим ўзгариши вазирлиги тасарруфидаги “Зомин” давлат қўриқхонасига ўрнатилган фотоқопқонга “Арча майдон” ҳудудида сайр қилиб юрган она-бола Туркистон силовсини тушиб қолди. Бу ҳақда вазирлик матбуот хизмати хабар берди.
Туркистон силовсини заиф, қисқариб бораётган, мозаик тарқалган кенжа тур ҳисобланади. Ғарбий Тян-Шан (Угом, Писком, Чотқол) ва Помир-Олой (Туркистон, Ҳисор, Кўҳитанг тизмаси)да тарқалган.
Ҳисор тоғ тизмасида 150 га яқин, Кўҳитанг тизмасида 20–25 та, Ғарбий Тян-Шанда эса 100 га яқин силовсин яшайди.
Туркистон силовсинлари 17 йилгача умр кўради. Овлаш тақиқланган. Ҳисор, Чотқол, Зомин, Сурхон қўриқхоналарида, Угом-Чотқол миллий табиат боғи ва “Зомин халқ” боғида муҳофаза остига олинган. SITES’нинг II иловасига киритилган.
Фотоқопқонга муҳрланган ноёб ҳайвонлар
2022 йилнинг октябрь ойида “Сурхон” давлат қўриқхонасига ўрнатилган фотоқопқонга манул тушиб қолганди. Шунингдек, “Ҳисор” давлат қўриқхонаси қўриқлаш ходимлари томонидан ўрнатилган фотоқопқон объективига Туркистон силовсини, “Чотқол” давлат биосфера қўриқхонасида эса қор қоплони муҳрлангани тўғрисида хабар берилганди.
Изоҳ (0)