Инвестициялар, саноат ва савдо вазири ўринбосари Ойбек Ҳамроев ва Саудия Арабистони Подшоҳлиги (SAP) инвестициялар вазири ўринбосари Муҳаммад Ал Ҳасна ўртасида 20 сентябрь куни видеоконференсалоқа орқали музокаралар ўтказилди. Бу ҳақда вазирлик ахборот хизмати хабар берди.
Унга кўра, мулоқот чоғида савдо-иқтисодий, инвестициявий, энергетика соҳаларида икки томонлама ҳамкорликнинг бугунги ҳолати ва уни ривожлантириш борасида кейинги амалий қадамлар муҳокама қилинди. Жумладан, Ўзбекистоннинг турли ҳудудларида муқобил энергия соҳасида қатор йирик лойиҳаларни амалга ошираётган АCWА Power компаниясининг ижобий тажрибаси қайд этилди. Компания ҳозирги кунда амалга ошираётган лойиҳалар ҳамда келгусидаги инвестиция ташаббусларини ҳаётга татбиқ этишда ҳар томонлама қўллаб-қувватлашга ўзаро тайёрлик билдирилди.
Шунингдек, Ўзбекистон президентининг 2022 йил август ойида Саудия Арабистони Подшоҳлигига давлат ташрифи вақтида имзоланган келишувларни амалга оширишни жадаллаштириш мақсадида SABIC, Saudi Telecom Company, Saudi National Bank, Dr. Sulaiman Al-Habib Medical Group, Jamjoom Pharma, Al Rajhi International, Ajlan & Bros Holding Group va Al Hokair Group компаниялари билан кимё, телекоммуникация, тиббиёт, фармацевтика соҳалари ва банк сектори, қишлоқ хўжалиги маҳсулотларини ишлаб чиқариш, чакана савдо тармоқларини ташкил этиш йўналишларида бир қатор лойиҳаларни маромига етказиб, фойдаланишга топширишни тезлаштириш истиқболлари муҳокама қилинди.
Саудия Арабистони томонидан 24—25 декабрь кунлари Ўзбекистон ва Саудия Арабистони Подшоҳлиги ўртасидаги савдо, иқтисодиёт, фан-техника, маданият, спорт ва ёшлар соҳаларида келишувларни мониторинг қилиш бўйича ҳукуматлараро комиссиянинг 6-йиғилишини SAPда ташкил этиш тўғрисидаги таклифи муҳокама қилинди.
Музокаралар якунлари бўйича томонлар эришилган барча келишувларни ўз вақтида амалга ошириш мақсадида ҳамкорликни оширишга тайёр эканини билдирди.
Изоҳ (0)