Тожикистоннинг Хатлон вилоятида жойлашган “Тигровая Балка” қўриқхонасининг тўқайзорлари ЮНЕСКОнинг Бутунжаҳон мероси рўйхатига киритилди, деб хабар бермоқда республика ТИВ матбуот хизмати.
Тегишли қарор 20 сентябрь куни Саудия Арабистони пойтахти Ар-Риёдда бўлиб ўтган ЮНЕСКО Моддий маданий меросни муҳофаза қилиш бўйича ҳукуматлараро қўмитасининг 45-йиғилишида қабул қилинган.
“Тигровая Балка” қўриқхонасининг тўқай ўрмонлари Халқаро ёдгорликлар ва диққатга сазовор жойларни муҳофаза қилиш кенгаши томонидан ўтказилган баҳолаш асосида Жаҳон мероси рўйхатига киритиш учун тавсия этилган.
Қўриқхона Тожикистон жануби-ғарбидаги Вахш ва Панж дарёлари оралиғида жойлашган. У қирғоқ бўйидаги тўқай экотизимларини, Буритов чўққисини, шунингдек, Хўжа-Қозиён тоғ тизмасини ўз ичига олади. Табиий объект ўзига хос биологик хилма-хилликка эга бўлган соҳилбўйи ўрмонларидан иборат.
“Тигровая Балка” қўриқхонасининг тўқай ўрмонлари Марказий Осиёда ушбу турдаги флоранинг энг катта ва бузилмаган ҳудудидир. Бу Осиё терагининг тўқай экотизими шунчалик кенг майдонда асл ҳолатида сақланиб қолган дунёдаги ягона жой.
Олимларнинг фикрига кўра, ўтган асрнинг ўрталарига қадар қўриқхонада Турон йўлбарслари яшаган. Аммо тўқай ўрмонларининг майдони қисқаргани сабабли ушбу ҳайвонлар учун яшаш жойлари камайиб кетган.
У ерда охирги марта 1954 йилда йўлбарсни кўришган.
“Тигровая Балка” давлат қўриқхонаси Тожикистон ССР Вазирлар Кенгашининг 1938 йил 4 ноябрдаги 1163-сонли қарори билан жанубий чўлларга хос ноёб чўл-тўқай экотизимлари ва ҳайвонларни сақлаш мақсадида ташкил этилган. Табиатни муҳофаза қилиш халқаро иттифоқининг амалдаги таснифига кўра, объект I тоифадаги қўриқланадиган ҳудудлар сифатида таснифланади.
Изоҳ (0)