Тожикистон президенти Эмомали Раҳмон Душанбеда бўлиб ўтаётган Марказий Осиё давлатлари раҳбарларининг бешинчи Маслаҳат учрашувида чегарадаги вазият ҳақида гапирди.
Сиёсатчига кўра, Афғонистонда турли террорчилик гуруҳлари фаоллиги кучайган.
“Сўнгги йилларда турли террористик гуруҳлар томонидан давлат чегарасини бузиб ўтиш ва ноқонуний равишда кесиб ўтишга уринишларга дуч келяпмиз. Яқинда жангариларнинг чегарани ёриб ўтишга бўлган икки уринишининг олди олинди. Улар Тожикистон пойтахти ва бошқа вилоятларида қатор терактлар уюштиришни мақсад қилган”, — деди Эмомали Раҳмон.
У гиёҳванд моддалар контрабандаси ҳажми ҳам ортиб бораётганига тўхталди.
“Рақамлар бу позицияни аниқ тасдиқлайди. Ўтган йили биргина мамлакатимизнинг ваколатли органлари Афғонистон билан чегарада 5 тоннага яқин наркотик моддаларни аниқлади. Бу 2021 йилга нисбатан 22 фоизга кўпдир. Бундай шароитда ҳамжиҳатликда ҳаракат қилишимиз керак”, — деди у Марказий Осиё давлатлари раҳбарларига.
Ўз навбатида, Ўзбекистон раҳбари Шавкат Мирзиёев Марказий Осиё чегараларини ҳимоя қилиш дастурини ишлаб чиқишни таклиф қилди.
“Биз Марказий Осиё давлатлари чегараларини ҳимоя қилиш ва мустаҳкамлаш бўйича давлатлараро дастурни ишлаб чиқишни бошлашни таклиф қиламиз”, — деди Ўзбекистон раҳбари.
Мирзиёев хавфсизликка анъанавий ва янги таҳдидларга қарши курашиш бўйича қўшма машғулотларни давом эттириш муҳимлигини айтди.
“Биз минтақавий прогнозлаш ва эрта огоҳлантириш тизимини шакллантиришни ва фавқулодда вазиятларга биргаликда жавоб бериш талаб деб ҳисоблаймиз. Афғонистондаги вазият хавфсизлик ва барқарорликка бевосита таъсир этувчи асосий омиллардан бири бўлиб қолмоқда”, — деди у.
Мирзиёев Афғонистоннинг амалдаги ҳукуматлари билан доимий ва очиқ мулоқот ва бу давлатнинг минтақавий иқтисодий мамлакатларга интеграциялашуви ниҳоятда муҳим эканини таъкидлади.
“Ўзбекистон афғон халқига зарур ёрдамни кўрсатишда давом этиш ниятида”, — деди у.
Изоҳ (0)