Forbes журналида яқинда чоп этилган мақолада журналист Мелик Кайлан АҚШ президенти Жо Байденнинг янги геостратегик ташаббусини таҳлил қилиб, бу жараёнда Ўзбекистон президенти Шавкат Мирзиёевнинг ролига эътибор қаратди.
Мақолада қайд этилишича, Шавкат Мирзиёев минтақада бизнес, чегара ва савдо очилишини фаоллаштириб, Марказий Осиё мамлакатларини интеграциялаш ҳаракатларида марказий шахсга айланди. Ўзбекистон Шавкат Мирзиёев раҳбарлигида шарқ ва ғарб, шимол ва жанубни боғловчи йирик транспорт марказига айланишга интилмоқда.
Ўзбекистон кучли олтин экспорти туфайли COVID-19 пандемияси даврида ривожланишдан тўхтамаган кам сонли иқтисодиётлардан бири бўлди.
Муаллиф Ўзбекистон ЖСТга аъзо бўлиш бўйича музокаралар олиб бораётганини таъкидлаб, АҚШни бу жараённи фаоллаштиришга чақирди. У, шунингдек, 1974 йилда АҚШда қабул қилинган Жексон-Веник тузатиши масаласига ҳам тўхталиб, унинг бекор қилиниши АҚШ ва Марказий Осиё мамлакатлари ўртасидаги савдо алоқаларини нормаллаштиришга хизмат қилиши мумкинлигини кўрсатиб ўтди.
Кайлан таъкидлашича, Байденнинг янги ташаббуси Ҳиндистон, Саудия Арабистони ва Европа ўртасида савдо йўлаги яратишга қаратилган бўлиб, бу АҚШни глобал геостратегик кураш майдонига қайтариш йўлидаги қадамдир. Ушбу ташаббуснинг муваффақияти кўп жиҳатдан Ўзбекистон ва Марказий Осиёнинг бошқа давлатлари билан стратегик шериклик муносабатларига боғлиқ.
Изоҳ (0)