Ўзбекистонда тадбиркорларга валюта конвертацияси бўйича ўрнатилган чеклов бекор қилингани, бу ҳақда Марказий банк бошқаруви раиси Мамаризо Нурмуродов журналистлар билан бўлиб ўтган мулоқотида “Жамият қабул қилмаган қарор — нотўғри қарор. У қайси мақсадга йўналтирилган бўлишидан қатъи назар”, дея қарор бекор қилинишини изоҳлагани очиқланганди. Марказий банк раиси мазкур матбуот анжуманида иқтисодчи блогер Отабек Бакировнинг фикрларига ҳам жавоб қайтарди.
Жуда бир ҳурмат қиладиган блогерим эскиларни эслаб, қарорларни эслабди. Худо хайрларингни берсин, гўёки Марказий банк ўзи қабул қилмаган, биз қабул қилган қарор бу. Ҳозирги айтган мулоҳазалардан келиб чиқиб, қабул қилган қароримиз. Сал қолибди, шунинг учун эрталаб, тонг саҳарда болаларга қўмитани чақиринглар, бу масалани кўриб чиқамиз, дедим. Демак, анча чуқурлашибди. Ўзбекчиликда бор-ку, гумон иймондан айиради, деган гап. Гумонимиз чуқурлашиб кетмасин деб, бугунги матбуот анжуманини чақирдик, — дейди Мамаризо Нурмуродов.
Иқтисодчи блогер Отабек Бакиров Марказий банкда қабул қилинган қарор ҳақида ёзиб, “Шахсан мен бу Марказий банкда қабул қилинган қарор деб ўйламайман. Чунки қонун бўйича мустақил Марказий банкда бундай қарорлар қабул қилиниши мумкин эмас, агар қабул қилинган бўлса, демак Марказий банк мустақиллигини бутунлай йўқотиб бўлган. Иккинчидан, биз кечаги қарор билан валюта бозорида де-юре Каримов режимига қайтдик. Банклар ва бизнес 18 сентябрдан амал қилиши лозим дейилаётган қоидалар Каримов имзолаган, ижроси Азимов ва Муллажоновга топширилган қарор ва унинг иккинчи иловасининг айнан ўзгинаси. Ҳатто ёмонроқ”, деганди.
Изоҳ (0)