Ливияда вайронкор сув тошқинлари оқибатида 5000 дан ортиқ одам ҳалок бўлди. Бу ҳақда BBC хабар берди.
Ливия ҳукумати ички ишлар вазири камида 5300 киши табиий офат қурбонига айланганини маълум қилди. Асосий қурбонлар ва вайронагарчиликлар мамлакат шарқидаги Дерна порт шаҳрида кузатилган. Шаҳардаги иккита дамба сув босими остида ёрилиб кетган. Ливия шарқини назорат қилувчи маъмуриятнинг соғлиқни сақлаш вазири аввалроқ 3000 дан ортиқ одам ҳалок бўлгани тасдиқланганди.
“Бедарак йўқолганлар сони минглаб, ҳалок бўлганлар сони эса 10 мингга етиши кутилмоқда”, — деди Усмон Абдел Жалил.
Дернада бутун бошли кварталлар сув остида қолган. Қабристондаги 700 дан ортиқ жасаднинг шахсини аниқлаш кутилмоқда, маҳаллий соғлиқни сақлаш расмийлари эса минглаб одамлар бедарак йўқолганини айтмоқда.
“Дерна шаҳридаги вазият тобора фожиали бўлиб бормоқда, қурбонлар сони бўйича якуний статистик маълумотлар йўқ. Кўп ҳудудларга ҳали кириш имкони йўқ”, — деди Жалил.
БМТ халқаро миграция ташкилоти маълумотларига кўра, Ливиянинг сув тошқинидан жабр кўрган ҳудудларида камида 34 минг киши ўз уйларини тарк этишга мажбур бўлган. Энг оғир зарба Дернада қайд этилган, у ерда бўрон оқибатида иккита дамба ёрилиб, 30 минг аҳоли қочқинга айланган.
БМТ маълумотларига кўра, улар бошпана ва ноозиқ-овқат маҳсулотларига муҳтож, аммо жабрланганларга ёрдам етказиш қийин, чунки ҳудуддаги аксарият йўллар сув остида қолмоқда, тўсиб қўйилган ёки вайрон бўлган.
Халқаро қутқарув қўмитаси хайрия ташкилотига кўра, Ливия шарқидаги кўплаб клиникалар ва шифохоналар тошқин қурбонлари билан тўлиб кетган.
“Тез ёрдам машиналари таъмирга муҳтож, жисмоний киришда қийинчиликлар ва моддий-техник ёрдамга бўлган эҳтиёж тиббий кўнгиллиларнинг зарар кўрган ҳудудларда ишлашини қийинлаштирмоқда. Сув орқали юқадиган касалликларнинг тарқалиши эҳтимоли ҳам ташвишга солмоқда”, — деди ташкилотнинг мамлакатдаги директори Эли Абуаун.
Айрим беморлар бошқа шаҳарларга эвакуация қилинмоқда, бироқ телефон алоқаси йўқлиги, йўллар ва кўприклар вайрон бўлгани сабабли жабрланган ҳудудларда тиббий ёрдам кўрсатиш қийин.
Сув тошқинлари кўплаб ҳудудларда интернет ва бошқа телекоммуникация хизматларини ишдан чиқарди, ҳозирда кўплаб ҳудудларда алоқа тикланган.
Табиий офат Ливияни Европа билан боғлайдиган денгиз ости кабелини узиб қўйган. Жабрланган ҳудудларда алоқани тиклаш ишлари олиб борилмоқда.
Айни пайтда пойтахт Триполидан фаолият юритувчи мамлакатнинг халқаро миқёсда тан олинган ҳукумати бош вазири Абдул Ҳамид Дбейбаҳ, унинг вазирлар маҳкамаси хорижий ёрдамни қабул қилишдан олдин баҳолашини айтди.
“Кўплаб ёрдам таклифлари бўлди ва биз фақат керакли ёрдамни қабул қиламиз”, — деди у.
Гуманитар ёрдам энг кўп жабр кўрган Дерна шаҳри жойлашган Ливиянинг шарқий қисмига кела бошлади, бироқ қутқарув ишларига сиёсий вазият тўсқинлик қилди — мамлакат икки рақобатчи ҳукумат ўртасида бўлинган.
“Халқаро ёрдамни танлаб қабул қилиш ҳам қутқарув операциясини мувофиқлаштиришни осонлаштиради”, деди Дбейбаҳ.
Шарқий Ливиянинг тан олинмаган ҳукумати фуқаро авиацияси вазири Ҳикем Абу Шкиуватнинг айтишича, Дернадаги вазият ҳалокатли.
“Жасадлар ҳамма жойда — денгизда, водийларда, бинолар остида ётибди. Шаҳарнинг 25 фоизи ғойиб бўлди десам, муболаға бўлмайди. Кўп, кўп бинолар қулаб тушди. Якуний йўқотишлар жуда катта бўлади”, — деди у.
Мутахассислар аввалроқ Дернадаги тўғонлар портлаши мумкинлиги ҳақида огоҳлантирган эди. Аммо бу содир бўлганда, ҳеч ким Дерна аҳолисини хабардор қилмаган.
Дернадан ташқари мамлакат шарқидаги Бенғози, Сус ва Ал-Маж шаҳарлари ҳам жабрланган.
Ливия армиясининг етти нафар аскари қутқарув ишлари чоғида ғойиб бўлган. Ливия шарқида расмийлар комендантлик соати жорий қилди, мактаб ва дўконларни ёпишни буюрган.
2011 йилда Муаммар Каддафий ҳокимиятдан ағдарилган қўзғолондан бери Ливия икки рақиб маъмурият ўртасида бўлинган. На тан олинган ва на тан олинмаган ҳукуматлар инфратузилмани сақлаш ва таъмирлашга сармоя киритмади, бу эса сув тошқинининг ҳалокатли оқибатларини тушунтириши мумкин.
BBC мухбири Амира Фатҳаллаҳ таъкидлаганидек, “Даниэль” бўронининг ҳалокатли таъсири мамлакатдаги заиф ва мураккаб сиёсий вазиятни биринчи ўринга олиб чиқди.
Ливияни рақобатдош органлар бошқаради — мамлакат ғарбида халқаро тан олинган Миллий бирлик ҳукумати ва шарқда Вакиллар палатаси деб номланган парламент.
Ушбу бўрон ўтган ҳафта Греция, Туркия ва Болгарияни босиб, ўнлаб одамларнинг ҳаётига зомин бўлганди. Энди у Ғазо секторига ҳам ёпирилди.
Изоҳ (0)