Туркиянинг Истанбул шаҳрида 5 сентябрь куни кучли ёмғирлар туфайли шаҳарнинг айрим қисмларини сув босгани ҳақида хабар берилган эди. Ўзбекистоннинг Истанбулдаги бош консулхонаси табиий офатдан ҳалок бўлганлар орасида Ўзбекистон фуқаролари йўқлигини маълум қилди.
Бош консулхонанинг билдиришича, расмий маълумотларга кўра, 4 нафар шахс вафот этган ва бир нечта киши жароҳат олган. Бош консулхона Истанбул вилоят ҳокимлиги ва мутасадди ташкилотлар билан боғланиши натижасида вафот этганлар орасида Ўзбекистон фуқаролари йўқлигини ўрганди. Жабрланганлар орасида Ўзбекистон фуқаролари борлиги ҳақида дипломатик ваколатхонага маълумот келиб тушмаган.
Туркияда 5 сентябрь куни кечқурун кучли ёмғирлар бир вақтнинг ўзида бир нечта вилоятларни қамраб олди. Истанбулда эса табиий офатдан энг кўп Башакшеҳир тумани зарар кўрди. У ердаги канал ўзанидан тошиб, бир қанча машиналарни сел олиб кетди. Ёмғир оқибатида метро бекати ва кутубхонани ҳам сув босди.
Табиий офат оқибатларини бартараф этишда 2,1 мингдан ортиқ ходим ишламоқда.
Истанбул аэропорти яқинидаги туннель ҳам сув остида қолган, бу эса йўловчиларга аэропортга етиб боришга тўсқинлик қилмоқда.
Изоҳ (0)