Алишер Қодиров “Меҳнат шуҳрати” ордени билан мукофотланди

Ўзбекистон мустақиллигининг 32 йиллиги муносабати билан давлат хизматчилари ҳамда ишлаб чиқариш ва ижтимоий-иқтисодий соҳалар ходимларидан бир гуруҳи мукофотланди. Президентнинг бу ҳақда тегишли фармони 27 август куни эълон қилинди.

Унга кўра, ушбу шахслар Ўзбекистон иқтисодий қудратини мустаҳкамлаш, барча соҳаларда ислоҳотларни муваффақиятли амалга ошириш борасидаги кўп йиллик самарали меҳнати, мамлакат тараққиёти ва халқ фаровонлигини таъминлаш, Янги Ўзбекистонни барпо этиш, унинг халқаро майдондаги обрў-эътибори ва нуфузини юксалтириш, инсон қадрини улуғлаш каби эзгу мақсадлар йўлидаги катта хизматлари, замонавий ишлаб чиқариш қувватларини яратиш, илғор инновацион технологияларни жорий этиш, ҳудудлар инфратузилмасини жадал ривожлантиришга қўшган муносиб ҳиссаси, жамиятда маънавий барқарорликни сақлаш, ёш авлодни она Ватанга муҳаббат, миллий ва умуминсоний қадриятларга ҳурмат руҳида тарбиялаш ишларидаги ибратли фаолияти учун қуйидагилар фахрий унвон, орден ва медаллар билан мукофотланди.

Хусусан, Ўзбекистон “Миллий тикланиш” демократик партияси Марказий кенгаши раиси Алишер Қодиров “Меҳнат шуҳрати” ордени билан мукофотланди.  Ўзбекистон Халқ демократик партиясининг Марказий кенгаши раиси Улуғбек Иноятов “Дўстлик” ордени билан мукофотланди.

Мукофотланган орасида 100 ёшдан ошган фуқаролар ҳам бор. Уларнинг 14 нафари “Шуҳрат” медалига лойиқ кўрилди:

• Акимниязова Бибихан — Тахтакўпир тумани, Қорақалпоғистон Республикаси;
• Аликулов Абди — Янгиер шаҳри, Сирдарё вилояти;
• Бобоқулов Абир — Узун тумани, Сурхондарё вилояти;
• Дусанова Чимири — Ғузор тумани, Қашқадарё вилояти;
• Зкрияева Сидика — Кармана тумани, Навоий вилояти;
• Маликов Турғун — Ўзбекистон тумани, Фарғона вилояти;
• Матякубова Шукур — Хонқа тумани, Хоразм вилояти;
• Норқўзиева Саламат — Балиқчи тумани, Андижон вилояти;
• Тангриев Турақул — Қоракўл тумани, Бухоро вилояти;
• Тураева Анзират — Паркент тумани, Тошкент вилояти;
• Усманова Ирисбан — Юнусобод тумани, Тошкент шаҳри;
• Шамсиева Марзия — Тайлоқ тумани, Самарқанд вилояти;
• Шерматова Ойхумар — Ғаллаорол тумани, Жиззах вилояти;
• Юлдашева Коромат — Мингбулоқ тумани, Наманган вилояти.

Мукофотланган давлат хизматчилари, ишлаб чиқариш ва ижтимоий-иқтисодий соҳалар ходимларининг тўлиқ рўйхати билан қуйидаги ҳавола орқали танишиш мумкин.