Alisher Qodirov “Mehnat shuhrati” ordeni bilan mukofotlandi

O‘zbekiston mustaqilligining 32 yilligi munosabati bilan davlat xizmatchilari hamda ishlab chiqarish va ijtimoiy-iqtisodiy sohalar xodimlaridan bir guruhi mukofotlandi. Prezidentning bu haqda tegishli farmoni 27-avgust kuni e’lon qilindi.

Unga ko‘ra, ushbu shaxslar O‘zbekiston iqtisodiy qudratini mustahkamlash, barcha sohalarda islohotlarni muvaffaqiyatli amalga oshirish borasidagi ko‘p yillik samarali mehnati, mamlakat taraqqiyoti va xalq farovonligini taʼminlash, Yangi O‘zbekistonni barpo etish, uning xalqaro maydondagi obro‘-eʼtibori va nufuzini yuksaltirish, inson qadrini ulug‘lash kabi ezgu maqsadlar yo‘lidagi katta xizmatlari, zamonaviy ishlab chiqarish quvvatlarini yaratish, ilg‘or innovatsion texnologiyalarni joriy etish, hududlar infratuzilmasini jadal rivojlantirishga qo‘shgan munosib hissasi, jamiyatda maʼnaviy barqarorlikni saqlash, yosh avlodni ona Vatanga muhabbat, milliy va umuminsoniy qadriyatlarga hurmat ruhida tarbiyalash ishlaridagi ibratli faoliyati uchun quyidagilar faxriy unvon, orden va medallar bilan mukofotlandi.

Xususan, O‘zbekiston “Milliy tiklanish” demokratik partiyasi Markaziy kengashi raisi Alisher Qodirov “Mehnat shuhrati” ordeni bilan mukofotlandi. Ushbu orden bilan O‘zbekistonda iqtisodiyot va madaniyat yuksalishiga, xalq farovonligi oshishiga, tinchlik va barqarorlik saqlanishiga xizmat qiladigan ulkan ishlar uchun mukofotlanadi.

“Mehnat shuhrati” ordeni bilan mukofotlanganlar BHMning 40 karrasi (13,2 million so‘m) miqdorida bir yo‘la to‘lanadigan pul mukofoti oladi va qonunchilikda belgilab qo‘yiladigan imtiyozlardan foydalanadi.

O‘zbekiston Xalq demokratik partiyasining Markaziy kengashi raisi Ulug‘bek Inoyatov “Do‘stlik” ordeni bilan mukofotlandi.

Ushbu orden bilan fuqarolar O‘zbekistonda yashayotgan barcha millat va elatlarning vakillari o‘rtasida do‘stlik, o‘zaro hamjihatlik va totuvlikni mustahkamlash ishida erishgan katta yutuqlari, O‘zbekiston xalqining boshqa mamlakatlar xalqlari bilan do‘stlik va har taraflama hamkorligini rivojlantirgani uchun mukofotlanadi.

“Do‘stlik” ordeni bilan mukofotlanganlar BHMning 30 karrasi (9,9 million so‘m) miqdorida bir yo‘la to‘lanadigan pul mukofoti oladi.

Mukofotlangan orasida 100 yoshdan oshgan fuqarolar ham bor. Ularning 14 nafari “Shuhrat” medaliga loyiq ko‘rildi:

• Akimniyazova Bibixan — Taxtako‘pir tumani, Qoraqalpog‘iston Respublikasi;
• Alikulov Abdi — Yangiyer shahri, Sirdaryo viloyati;
• Boboqulov Abir — Uzun tumani, Surxondaryo viloyati;
• Dusanova Chimiri — G‘uzor tumani, Qashqadaryo viloyati;
• Zkriyayeva Sidika — Karmana tumani, Navoiy viloyati;
• Malikov Turg‘un — O‘zbekiston tumani, Farg‘ona viloyati;
• Matyakubova Shukur — Xonqa tumani, Xorazm viloyati;
• Norqo‘ziyeva Salamat — Baliqchi tumani, Andijon viloyati;
• Tangriyev Turaqul — Qorako‘l tumani, Buxoro viloyati;
• Turayeva Anzirat — Parkent tumani, Toshkent viloyati;
• Usmanova Irisban — Yunusobod tumani, Toshkent shahri;
• Shamsiyeva Marziya — Tayloq tumani, Samarqand viloyati;
• Shermatova Oyxumar — G‘allaorol tumani, Jizzax viloyati;
• Yuldasheva Koromat — Mingbuloq tumani, Namangan viloyati.

Mukofotlangan davlat xizmatchilari, ishlab chiqarish va ijtimoiy-iqtisodiy sohalar xodimlarining to‘liq ro‘yxati bilan quyidagi havola orqali tanishish mumkin.