Ўзбекистонда ҳарорат пасайиб, ёмғир ёғиши кутилмоқда

Ўзбекистон ҳудудига 26—28 август кунлари нам ва салқин ҳаво массалари кириб келади, деб хабар бермоқда “Ўзгидромет” директори.

Республика ҳудуди бўйича 26—27 августда шамол тезлиги 17-22 метр/секундгача кучайиши кутилмоқда, баъзи жойларда 23-25 метр/секундгача кучайиши, айрим жойларда чанг-тўзонлар билан кузатилиши мумкин.

27—28 август кунлари кундузи ҳаво ҳарорати 23-28 даражагача пасаяди.

26 августда республика шимолида ва чўл ҳудудларда, 27—28 августда қолган ҳудудларда вақти-вақти билан ёмғир ёғади, момақалдироқ бўлиши мумкин. Тоғолди ва тоғли ҳудудларда ёмғир баъзи жойларда кучли бўлади.

Кутилаётган кучли ёмғирлар ёғиши ҳисобига республиканинг тоғолди ва тоғли ҳудудларида 27—29 август кунлари сел-сув тошқини юзага келиши мумкин.

“Тоғолди ва тоғли ҳудудларда истиқомат қилувчи фуқароларни, дам олувчиларни ҳамда тоғли ҳудудларда ҳаракатланувчи ҳайдовчиларни эҳтиёткорлик чораларини кўришларини сўраймиз”, — деб огоҳлантирди “Ўзгидромет” директори.