Камбағалликни қисқартириш ва бандлик вазирлиги хотин-қизларни иш билан таъминлаган тадбиркорларга қандай имтиёзлар борлиги ҳақида тушунтириш берди.
Унга кўра, Вазирлар Маҳкамасининг 2022 йил 31 мартдаги “Хотин-қизлар муаммоларини ўрганиш ва ҳал этиш тизимини янада такомиллаштириш чора-тадбирлари тўғрисида”ги 145-сон қарори билан тасдиқланган низомга асосан тадбиркорлик субъектларининг “Аёллар дафтари”га киритилган хотин-қизларни иш билан таъминлашга қаратилган лойиҳаларига Оилавий тадбиркорликни ривожлантириш давлат дастури доирасидаги ресурслар ҳисобидан йиллик 14 фоизлик ставкада имтиёзли кредитлар ажратилиши мумкин.
Бунда кичик тадбиркорлик субъектлари томонидан “Аёллар дафтари”га киритилган хотин-қизларни доимий иш билан таъминлаш шарти билан самарадорлиги юқори ва барқарор иш ўринлари яратишга қаратилган лойиҳаларига Оилавий тадбиркорликни ривожлантириш Давлат дастурлари доирасидаги ресурслар ҳисобидан 225 миллион сўмдан ортиқ, бироқ 1 миллиард сўмдан кўп бўлмаган миқдорда белгиланган тартиб асосида кредит ажратилиши мумкин.
Кредит суммасининг аниқ миқдори тадбиркор томонидан иш билан таъминланадиган ҳар бир хотин-қиз учун 33 миллион сўмгача миқдорга мутаносиб равишда белгиланади. Демак, мазкур кредит иш билан таъминланган хотин-қизларни сонига қараб берилиши инобатга олинадиган бўлса, тадбиркор энг камида 7 нафар хотин-қизни иш билан таъминлаши керак. 33 миллион сўмдан 7 нафар иш билан таъминланган хотин-қизлар учун максимал 231 миллион сўм кредит ажратилади.
Агар 6 нафар аёллар иш билан таъминланса, тадбиркорга кўпи билан 198 миллион сўм кредит ажратилади. Унда юқоридаги 225 миллион сўмдан ортиқ, бироқ 1 миллиард сўмдан кўп бўлмаган деган жойига тушмай қолади. Шунинг учун энг камида 7 нафар аёллар дафтарига киритилган хотин-қизларни иш билан таъминлаш мажбурияти билан иш бошлаш мумкин.
Изоҳ (0)