АҚШ ҳукумати Москвага “халқаро санкцияларни четлаб ўтишда ёрдам бергани” учун Туркияга қарши чора кўришни режалаштирмоқда, деб ёзди Тhе Wаll Street Journal ўз манбасига таяниб.
Америка расмийлари Туркиянинг Россияга нисбатан қўйилган чекловларга риоя қилишини таъминлашга, бироқ айни пайтда “турк томонига санкция қўллаш сценарийсидан қочишга” уринмоқда. Нашр суҳбатдошига кўра, Вашингтон бу масала бўйича Анқара билан мулоқот ўрнатган ва уни Москвага ёрдам кўрсатиш оқибатлари ҳақида огоҳлантирмоқда.
АҚШ ва бошқа Ғарб давлатлари Россияга санкция остидаги маҳсулотлар Туркия орқали етказиб берилишидан бир неча бор хавотир билдирган, Ғарб Россияга яқин давлатлардан экспорт оқими кескин ошганини қайд этган. Вашингтон ўтган йили турк ширкатларини чекловларни четлаб ўтгани учун жазолаш билан таҳдид қилганди, шунингдек, вазият икки томонлама муносабатларга путур етказишини таъкидлаган.
Туркия ҳукумати республикадаги ҳеч бир шахс ёки муассасанинг санкцияларни четлаб ўтишига йўл қўймасликка ваъда берган, шу билан бирга Анқара чекловларга қўшилмаяпти.
“Биз Ғарб санкцияларига боғланмаймиз. Биз кучли давлатмиз ва Россия билан ижобий муносабатдамиз”, — деган Туркия президенти Ражаб Тоййиб Эрдўғон.
20 июль куни АҚШ Россияга нисбатан жорий этилган санкцияларни “бузгани” учун Қирғизистоннинг тўртта компаниясига қарши санкциялар эълон қилди. Тhе Washington Post ёзишича, Вашингтон Бишкекни Россияга Хитой дронларини етказиб беришда гумон қилмоқда.
16 август куни АҚШ Молия вазирлиги Россия, Қозоғистон ва Словакия компанияларига “Шимолий Корея билан алоқаси” учун санкциялар жорий қилди.
Изоҳ (0)