АҚШда Конгрессга мурожаат қилмасдан туриб, Presidential Drawdown Authority (PDА) президент дастури доирасида Украинага ёрдам бериш учун 6 миллиард доллар қолган, деди Пентагон матбуот котиби ўринбосари Сабрина Сингх брифингда.
“PDА маблағларига келсак, бизда пул танқислиги йўқ. Йил бошида амалга оширилган қайта баҳолашдан олинган маблағ бор ҳали. Эсингизда бўлса, бу тахминан 6 миллиард долларни ташкил этади. Бу катта миқдор ва биз Украинани жанг майдонида зарур бўлган нарсалар билан таъминлашда давом этишимизга ишончим комил ”, — деди у.
Унинг сўзларига кўра, гап Пентагондан Украинага берилган ҳарбий мулкни қайта баҳолаш жараёнида иқтисод қилинган пуллар ҳақида кетмоқда. Сингх маъмуриятда бундан ортиқ пул бор-йўқлигини айтмади.
PDA’дан ташқари, Вашингтон Киевни Украина хавфсизлигига кўмаклашиш ташаббуси (USAI) орқали қўллаб-қувватлайди. Унда қанча пул борлигини сўрашганида, Сингх бу маълумотларни “текшириш” кераклигини айтди.
АҚШнинг Украинага сўнгги ёрдам пакети июль ойи охирида ажратилган эди, унинг миқдори 400 миллион долларни ташкил қилган.
Аввалроқ Тhe Washington Post нашри Украина Иккинчи жаҳон урушидан буён АҚШдан энг кўп ёрдам олган давлатга айлангани ҳақида хабар берганди.
Ҳисоб-китобларга кўра, Россия ва Украина ўртасида кенг кўламли уруш бошланганидан кейин Вашингтон Киевни қўллаб-қувватлаш учун 66 миллиард доллардан ортиқ маблағ юборди. Шундан 43 миллиарди ҳарбий ёрдамга, 20,5 миллиарди иқтисодий ёрдамга ва 2,6 миллиарди гуманитар ёрдамга тўғри келди.
Изоҳ (0)