Абдулла Арипов Тошкентда “новостройка”га пул тўлаб куйган мингдан ортиқ фуқаро билан учрашди

Айни вақтда бош вазир Абдулла Арипов Тошкент шаҳрида Aziya Invest Favorit МЧЖ томонидан қурилаётган кўп қаватли уй-жойлардаги хонадонларнинг фуқароларга сотилиши юзасидан келиб чиққан низоли вазият қатнашчилари билан учрашув ўтказмоқда. Бу ҳақда “Дарё” мухбири хабар берди.

Aziya Invest Favorit МЧЖ билан Тошкент шаҳри Яшнобод тумани Иззат кўчасида қурилиши режалаштирилган кўп қаватли уйлардан квартира сотиб олиш бўйича шартнома тузган мингдан ортиқ фуқаролар орадан 1,5 йилдан кўпроқ вақт ўтганига қарамай қурилиш ишлари ҳали бошланмаганидан шикоят қилишганди.

Ҳолат юзасидан зудлик билан Вазирлар Маҳкамасининг тегишли фармойиши ташкил этилиб, Иззат тураржой мажмуасидан уй сотиб олмоқчи бўлиб, алданиб қолган фуқароларнинг муаммосини ўрганиш ва уларни бартараф этишга қаратилган таклифлар тайёрлаш бўйича Ҳукумат комиссияси тузилган.

“Ҳозирги кунда жиноятларнинг 20 фоиздан кўпини қаллоблик ва фирибгарликни ташкил қилмоқда. Бу халқимизнинг ишонувчанлиги ва ҳуқуқий саводи пастлигини кўрсатмоқда. Бизни аксар одамлар шартномани ўқимасдан қўл қўяди.

Бу каби ҳолатлар уй-жой қуриш ва унинг савдоси юзасидан қонунчиликни қайта кўриб чиқиш бўйича таклифлар бердик. Мазкур ҳолат республикадаги энг катта иш. Бундан ташқари яна 4-5 та ҳолат бор”, — дейди Абдулла Арипов.

Aziya Invest Favorit МЧЖ ва фуқаролар ўртасида юзага келган муаммоли масалаларни тезкор ҳал қилиш ва уй-жойлар қурилишини тўлиқ, сифатли ва тезкор якунлаб фойдаланишга топшириш мақсадида тузилган комиссияга бош вазир ўринбосари Очилбой Раматов раис этиб белгиланган эди.

21 июль куни бош вазир Абдулла Арипов Тошкент шаҳрида Aziya Invest Favorit ва фуқаролар ўртасида келиб чиққан низоли вазият қатнашчиларини қабул қилган ва муаммо ҳал этилишини айтганди.

Маълумотларга кўра, ушбу МЧЖ мансабдорлари томонидан фуқароларга етказилган зарар 300 миллиард сўмдан ошади. Ҳолат юзасидан Жиноят кодексининг 168-моддаси (фирибгарлик) 4-қисми билан жиноят иши қўзғатилган.

Бош вазир ўринбосари Очилбой Раматов бошчилигидаги Ҳукумат комиссияси томонидан Бош прокуратура билан ҳамкорликда 2 та ҳолат бўйича ҳам жабрланган фуқароларнинг муаммоларини ҳал этиш юзасидан тайёрлаган таклифлари ўқиб эшиттирилмоқда.