Лионель Мессидан дастхат сўраган “Интер Майами” ходими ишдан бўшатилди

“Интер Майами” стадионида ишлайдиган фаррош Лионель Мессидан дастхат олгани учун ишдан бўшатилди.

Колумбиялик Кристиан Саламанка бир ярим йилдан буён Майамида яшаб келган ва “Интер Майами”да фаррош сифатида фаолияти юритган.

У Мессидан дастхат сўраган ва шундан сўнг ишдан ҳайдалган.

“Автобус тўхтайдиган жойларни тозалашим керак эди. Омадни қарангки, айнан ишлаётган маҳалим автобус кириб келди ва ундан футболчилар туша бошлади. Лео энг охирида тушди. Мен унга қараб: “Ҳей, жаҳон чемпиони!”, — дея бақирдим. У эса менга қаради.

Хизмат кийимимни ечдим, унинг остида эса Аргентина либоси бор эди. Месси ушбу либосга дастхат қўйиб берди.

Сўнгра қўриқчи келиб, мени олиб кетди. Мени ишдан ҳайдашди. Лекин бу шунга арзирди”, — деди Кристиан.

“Интер Майами” ички қоидаларига кўра, стадион хизматчилари иш вақтида юлдузлар билан суратга тушиши ва улардан дастхат олиши қатъиян тақиқланади. 

Қайд этиб ўтиш жоиз, Лионель Месси “Интер Майами”га ўтганидан сўнг 3 та ўйинда иштирок этиб, 5 та голга муаллифлик қилди.