“Ҳоким қонун олдида жавоб бериши керак” — фаоллар Сурхондарё ҳокими ва мактаб директори ўртасидаги тортишув ҳақида

Ижтимоий тармоқларда Сурхондарё вилояти ҳокими Улуғбек Қосимов мажлисда Сариосиё туманидаги мактаб директори Умида Турсунова билан тортишгани акс этган видео тарқалди. Даҳанаки жанжалда ҳоким Турсуновани ишдан олганини айтган. Директор бунинг сабабини сўраган. Ўртада тортишув юзага келган. Видео якунида Турсуновани ички ишлар ходимлари мажлислар залидан олиб чиқиб кетгани акс этган. Аввалроқ сайтимизда воқеа тафсилотларига доир мақола эълон қилинганди. Мазкур тортишув ижтимоий тармоқларни жунбишга келтирди. Фаоллар воқеа юзасидан турли фикрларни билдирмоқда.

“Вазиятни шахсан ўз назоратимга олдим”

Воқеа юзасидан мактабгача ва мактаб таълими вазири Ҳилола Умарова муносабат билдирди.

“Сурхондарё вилояти Сариосиё туманидаги 28-мактаб директори билан боғлиқ вазиятни шахсан ўз назоратимга олдим. Мактаб директори айни дамда маъмурий қамоқ жазосидан озод этилди. Шу ўринда таълим соҳасида фаолият юритаётган ҳар бир шахс муомала маданияти билан барчага ўрнак бўлиши лозимлигини эслатиб ўтмоқчиман”, — деб ёзган у Telegram’да.

“Ҳоким жаноблари қонун олдида жавоб бериши керак”

Ҳуқуқшунос Саидали Мухторалиев ўз саҳифасида тортишувнинг юридик жиҳатларига тўхталиб ўтди.

“Шахсан мен бу аёл, бу мактаб директори мисолида ўз ҳуқуқи учун курашадиган, нафақат ўзини, оиласини ҳамда ўз жамоасини ҳимоя қила оладиган қатъиятли шахсни кўрдим. Бизга мана шундай раҳбарлар керакмасми аслида? Кечагина депутатлар “Педагогнинг мақоми тўғрисида”ги қонун лойиҳасини қабул қилишди. Бу қонун нақадар долзарб ва зарур эканлигини мана шу ҳоким ва мактаб директори ўртасидаги мунозара мисолида яна бир бор кўрдик.

Ҳоким жаноблари қонун олдида жавоб бериши керак. Кейин мактаб директори алоҳида ҳимояга олинмас экан, унга нисбатан ҳар хил асоссиз бўҳтонлар ўйлаб топилиши ҳеч гап эмас. Бундан ташқари, бу опага нисбатан маъмурий қамоқ жазоси ҳақида қарор чиқарган судьянинг масаласи Судьялар олий кенгаши томонидан албатта кўриб чиқилиши керак.

Гап бу ерда судьянинг мустақиллиги ҳақида кетяпти. Катта эҳтимол билан мактаб директорига нисбатан қамоқ жазоси ҳақида қарор чиқарган судья ҳокимлик босими остида мустақил ҳаракат қилмаган бўлиши мумкин. Ҳатто президент судьяларнинг мустақиллиги борасида қатъий талаблар қўяётган бир вақтда, буни истамаётган ва бунга лойиқ бўла олмаётган судьяларга тизимда умуман ўрин йўқ. Бу воқеа таълим ташкилотлари фаолиятига ҳокимларнинг асоссиз аралашувига зудлик билан барҳам берилишини талаб этмоқда”, — деб ёзган ҳуқуқшунос.

“Бирор одам директорнинг ёнини олмади”

Журналист Ибрат Сафо Facebook’даги саҳифасида ҳокимнинг аёлга нисбатан қўполлиги қаттиқ таъсир қилгани ҳақида ёзган.

“Сурхондарё вилояти ҳокими ва мактаб директори бўлган аёл ўртасидаги тортишувнинг асосида нималар ётганини ўрганмадим, лекин видеосидан менга энг қаттиқ ботгани ­— ҳокимнинг миршабларга аёлни “йўқот” деб айтгани бўлди. Феодализм замонлари аллақачон қайтгандек — маҳаллий хонлар сени пашшадек кўрмайди, ҳузуримдан йўқот, бошини танасидан жудо қил дейишларига оз қолди, шекилли”, — деб ёзган Ибрат Сафо.

Журналист Анора Содиқова воқеа ҳақидаги фикрида мактаб директорини атрофида ҳеч ким ҳимоя қилмаганига урғу берган.

“Мактаб директори ўз ҳақ-ҳуқуқини ҳимоя қилмоқда. Атрофда биронта одам ёнини олмади. “Ахир у ўз ҳуқуқини талаб қиляпти”, демади ҳеч ким. Афсуски, биз шундай мўминлармиз. Рўмол, ҳижоб, соқол суннат, фарз деймиз-у, бир мазлумани ёнини ололмаймиз. Ҳокимга “сенинг шундай қилишга ҳақинг йўқ. Нима деяпсан?”, дея олмаймиз. Адолатни ёнини ололмайдиган мўминлармиз. Ҳолбуки, Аллоҳ адолатни севади”, — деб ёзган у.

“Педагогларни беҳурмат қилманг”

Депутат Алишер Қодиров ҳам воқеа юзасидан ўз муносабатини билдирди

“Президентнинг вакили педагогларга муносабатда президентдан ўрнак олиши керак. Ҳақоратга рози бўлган педагог фарзандларимизни оёқости бўлишга розиликка ўргатади! Педагогларни беҳурмат қилманг”, — дея ёзди “Миллий тикланиш” партияси раҳбари.

Ёзувчи Жавлон Жовлиевнинг фикрича, миллатга қўрқмас ўқитувчилар керак.

“Бизда силлиқ, боши эгилган ўқитувчилар сероб, бизга энди қўрқмаслари керак! Бизга “муомаласи чатоқ”, лекин илмли, довюрак, ҳақиқатга тик боқадиган, нима буюрса қилиб кетавермайдиган, ўзига ишонган устозлар керак! Чунки авлодлар-келажак уларнинг қўлида”, — деб ёзади у.

Тадбиркор Бектош Ҳотамов директор аёл ҳокимнинг буйруғи билан қамалганидан ҳайратга тушганини яшира олмади.

“Сурхондарёда мактаб директори вилоят ҳокими ўтказган йиғилишда ҳоким билан даҳанаки жанг қилди. Кейин ҳокимнинг буйруғи билан директор опани ташқарига олиб чиқиб кетишди. Маълум бўлишича, директор аёлни маъмурий қамоқ жазоси билан сийлаб қамаб қўйишган. Кейин яна маълум бўлишича, вазият мактабгача ва мактаб таълими вазирининг назоратига олинган ва директор опа озодликка чиқарилган. Менда битта савол: директор опани қамаган судья ҳозир борми, тирикми, у мустақилми? У ҳоким айтса, қамаса, вазир айтса, озодликка чиқарса, у ўзи судьями? Ёки опа ҳеч қандай судсиз қамалдимикан? Унақа десам ҳозир феодализм эмас, биз ҳуқуқий-демократик давлатда яшаяпмиз. Хуллас, шу жойида ишлам калламаяпти”, — дея муносабат билдирган у.

Яқинда вазир Ҳилола Умарова яна бир баёнот билан чиқди. Маълум қилинишича, Умида Турсунова мактаб директори сифатидаги иш фаолиятини давом эттиради.

“Давлат томонидан олиб бораётган таълим соҳаси ходимларини обрў ва нуфузини кўтариш каби устувор сиёсатни қўллаб-қувватлаган ҳолда ҳар бир раҳбар ходим педагогларимизга ҳурмат билан муносабатда бўлишларини, мактабда педагог ходимлар фаолият юритиши учун қулай шарт-шароит яратишга эътибор қаратишларини, мактабдаги маънавий муҳит, таълим сифати ва мазмуни билан боғлиқ ҳар қандай вазият вазирлик назоратида эканлигини эслатиб ўтмоқчиман”, — дея маълум қилган Ҳилола Умарова.