Самарқанддаги сув омборида тўрт нафар йигитнинг сувга чўкиб вафот этгани ҳақида хабар берилганди. “Дарё” мухбири билан суҳбатлашган воқеа гувоҳининг айтишича, йигитлар маст ҳолда бўлган.
Таъкидланишича, вафот этган тўрт нафар йигитнинг икки нафари Самарқанд вилояти Паст Дарғом туманидаги тиббиёт техникумида ўқиган.
“Марҳумларнинг икки нафари техникум талабаси эди. Қолган икки нафари ҳам шу техникумда ўқиб кетганди. Улар ўша куни дам олишга чиққан. Менга ҳам эрталаб телефон қилиб, таклиф қилишганди. Ўша куни ишларим борлиги сабаб, воқеа жойига соат 15:00 ларда бордим. Йигитларнинг чўкиб кетиши тахминан 14:30 ларда содир бўлган. Боиси, мен воқеа жойига борганимда, ярим соат олдин шу воқеа содир бўлди дейишганди”, — дейди Паст Дарғом тиббиёт техникуми ўқитувчиси.
Ўқитувчининг қўшимча қилишича, воқеа жойига етиб борганида у ердагилар Орзимурод исмли бола бир кишини қутқаргани ҳақида гапириб беришган.
“Улар қайиққа чиқиб, анча узоққа сузиб боришган. Борган жойда сув ўтлари бўлган. Сувга тушишган пайтда сув ўтлари бор жой бўлгани учун, чиқиб кетишолмаган. Лекин Орзимурод исмли бола бир кишини сувдан олиб чиққан. У сувдан олиб чиқилганида спиртли ичимлик ҳиди анқиб турган бўлган. Ҳозирда унинг аҳволи яхши”, — дейди суҳбатдош.
Бош прокуратурага кўра, ҳозирда қидирув-қутқарув ишлари олиб борилмоқда. Ҳолат юзасидан туман прокуратураси томонидан терговга қадар текширув ҳаракатлари бошланган. Олиб борилган қутқарув ишлари давомида бир киши — 21 ёшли О.Э.нинг мурдаси топилган.
Изоҳ (0)