Тошкент вилоятининг Ангрен шаҳридаги автомобиль йўлида транспорт қатновини тўхтатиб, “ҳоким, ҳоким”, деб бақирган қизлар видеоси тарқалди. Ангрен шаҳар ҳокимлиги ахборот хизмати мазкур воқеага изоҳ берди.
Жорий йил 10 июль куни “Sungreen tex” чет эл корхонаси ишчи ходимларининг бир гуруҳи корхона раҳбариятининг беш кунлик иш ҳафтасини олти кунликка ўтказиш тартибидан норози бўлиб, Оҳангарон кўчасида йўлни тўсган. Воқеадан хабар топган шаҳар ҳокими бошчилигида сектор раҳбарлари ва мутасаддилар воқеа жойига етиб бориб, ишчи ходимлар эътирозини тинглаб, корхона раҳбариятига мурожаат қилган. Шаҳар ҳокими бошчилигидаги сектор раҳбарлари ҳамда корхона маъмурияти ўртасида бўлиб ўтган ўзаро мулоқотдан сўнг, муаммо ишчи ходимлар фойдасига ҳал бўлган, — дейилади ҳокимлик изоҳида.
Ҳокимликнинг “Дарё”га қўшимча қилишича, корхона раҳбарияти ишчилари белгиланган иш режани бажаришга улгурмагани учун, ишчиларига олти кун ишлашни таклиф қилган.
Бу корхона ишлари соатбай асосида ишлашар экан. Бир кунда 80 та тайёр кийим тикиш режаси белгиланган бўлса-да, ишчилар 40 та тикишган. Яъни белгиланган режа бажарилмагач, раҳбарият иш кунини кўпайтириб, уларнинг натижасини яхшилашни мақсад қилган. Аммо бу таклифни баъзи ишчилар нотўғри талқин қилиб, барчани кўчага олиб чиққан. Ҳамда ҳокимликка боришга чорлаган. Аслида корхона раҳбарияти олти кунлик иш куни бўлса, маошни ҳам шунга яраша тўлаймиз деган. Лекин ишчилар шанба куни болаларимизни қаерга қўямиз деб бунга норози бўлган, — дейди ҳокимлик ахборот хизмати раҳбари Гулшода Шаҳанова.
Маълумот берилишича, бугунги кунда корхонада 747 нафар ишчи ходим, беш кунлик иш ҳафтаси тартибида фаолият юритмоқда.
Изоҳ (0)